Keshe Parlament Senaty Áleýmettik-mádenı damý komıteti músheleriniń memlekettik organ basshylarymen Elbasy Nursultan Nazarbaevtyń «Qazaqstan-2050» Strategııasyn júzege asyrý sheńberinde «Elimizdi áleýmettik jańǵyrtý boıynsha júrgizilip jatqan jumystardyń barysy» taqyrybyn talqylaǵan kezdesýi boldy.
Keshe Parlament Senaty Áleýmettik-mádenı damý komıteti músheleriniń memlekettik organ basshylarymen Elbasy Nursultan Nazarbaevtyń «Qazaqstan-2050» Strategııasyn júzege asyrý sheńberinde «Elimizdi áleýmettik jańǵyrtý boıynsha júrgizilip jatqan jumystardyń barysy» taqyrybyn talqylaǵan kezdesýi boldy.
Kezdesýdi Áleýmettik-mádenı damý komıtetiniń tóraǵasy Aqan Bıjanov ashyp, júrgizip otyrdy. О́ziniń kirispe sózinde komıtet tóraǵasy «Qazaqstan-2050» Strategııasy áleýmettik máselelerge úlken kóńil bóletinin aıta kelip, osy baǵytta qabyldanǵan baǵdarlamalardyń oryndalý barysy týraly komıtet músheleri tolyq habardar bolǵysy keletinin jetkizýmen birge, memlekettiń jańa áleýmettik saıasatynyń ereksheligi men ózektiligin atap ótti. Áleýmettik qorǵaý tetikterin kúsheıtý, aımaqtardaǵy áleýmettik teńsizdikterdi joıý, eńbek jáne jumyspen qamtý saıasatyn jańǵyrtý, densaýlyq saqtaý men bilim berý júıesin damytý máseleleri memlekettiń strategııalyq baǵyttaryn maqsat etken sheshimderdiń qatarynda, dedi ol.
Sonymen birge, áleýmettik baǵdarlamalardyń oryndalýyna zańnamalyq turǵydan qoldaý qajet bolsa, parlamentarııler bul iske árqashan da daıyn ekendigi aıtyldy. Osy turǵyda Memleket basshysy eńbekaqy, zeınetaqy men járdemaqynyń, kepildi dárigerlik jáne bilim berý qyzmetteriniń kólemin, mektepke deıingi tárbıemen qamtamasyz etý, sondaı-aq, osy standarttardy buzǵany úshin laýazymdy adamdar men jumys berýshilerdiń jaýaptylyǵyn ornyqtyrýmen birge, ómir sapasynyń eń tómengi negizgi kórsetkishteri kórinis tabatyn áleýmettik standarttar men áleýmettik quqyqtar týraly zań jobasyn ázirleý týraly tapsyrma bergenin atap ótti.
Elimizdi áleýmettik jańǵyrtýǵa múmkindik beretin baǵdarlamalardyń oryndalý barysy týraly alǵashqy baıandamany Eńbek jáne halyqty áleýmettik qorǵaý mınıstri Tamara Dúısenova jasady. «Jumyspen qamtýdyń jol kartasy-2020» baǵdarlamasy boıynsha ústimizdegi jyldyń 1 qarashasyna deıingi málimetke sáıkes shamamen 256 myń adam memlekettik kómek alǵan. Baǵdarlamaǵa qatysýshylardyń jartysynan astamy 29 jasqa deıingi jastar. Osy shara boıynsha barlyǵy 234 myń adam jumysqa ornalasqan. Sonyń ishinde 109 myńy qaıta daıarlaý, daıyndaý jáne biliktiligin arttyrý kýrstarynan ótken. 16 myńnan astamy shaǵyn nesıelermen qamtylyp, qosymsha 12 myń jańa jumys oryndary ashylǵan.
Sondaı-aq, baǵdarlamany oryndaý barysynda 11 myńnan artyq adamnyń jumysy bar jerlerge kóshirilip, olardyń arasynan jumys isteýge qabilettileriniń 80 paıyzǵa jýyǵy eńbekke tartylǵany belgili boldy. Al aýyldyq ınfraqurylymdardy damytý boıynsha 1485 joba iske asyrylyp, sonyń arqasynda 26 myń adam jumyspen qamtylypty. Sonymen birge, baıandamashy baǵdarlamany iske asyrýǵa qolbaılaý bolyp otyrǵan jaıttarǵa de toqtalyp ótti. Sonyń ishinde baǵdarlamanyń qalyń kópshilikke taramaı, kóptegen eldi mekenderdiń onyń iske asyrylý tetikterinen habarsyz ekendigi aıtyldy.
Qosymsha baıandama jasaǵan Ekonomıka jáne bıýdjettik josparlaý mınıstri Erbolat Dosaev kezdesýge qatysýshylardy ázirlenip jatqan eń tómengi áleýmettik standarttar týraly zań jobasy jáne onyń negizgi qarjy-ekonomıkalyq kórsetkishteri týraly habardar etti.
Kezdesýge, sondaı-aq, Sport jáne deneshynyqtyrý jónindegi agenttiktiń tóraǵasy Tastanbek Esentaev, Densaýlyq saqtaý mınıstriniń orynbasary Erik Baıjúnisov, Bilim jáne ǵylym mınıstriniń orynbasary Taqyr Balyqbaev, Mádenıet jáne aqparat mınıstrliginiń jaýapty hatshysy Janna Kurmanǵalıeva, Kásipodaqtar federasııasy tóraǵasynyń orynbasary Qaırat Amandyqov qatysyp, depýtattardyń saýaldaryna jaýap berdi.
Kezdesýdi qorytyndylaı kelip, A.Bıjanov bul talqylaýdyń elimizdiń áleýmettik jańǵyrtýdyń quqyqtyq bazasyn jetildirýdegi jumystardyń tıimdiligin arttyrýǵa yqpal etetinin atap ótti.
Jaqsybaı SAMRAT,
«Egemen Qazaqstan».
