Astanadaǵy L.N.Gýmılev atyndaǵy Eýrazııa ulttyq ýnıversıtetinde «Qazaqstannyń bolashaǵy – qazaq tilinde» atty televızııalyq jobasynyń qorytyndy marapattaý rásimi bolyp ótti.
Astanadaǵy L.N.Gýmılev atyndaǵy Eýrazııa ulttyq ýnıversıtetinde «Qazaqstannyń bolashaǵy – qazaq tilinde» atty televızııalyq jobasynyń qorytyndy marapattaý rásimi bolyp ótti.
Bul joba Mádenıet jáne aqparat mınıstrligi Til komıtetiniń tapsyrysy boıynsha túsirilip, «QazMedıa Holdıng» jaýapkershiligi shekteýli seriktestigi jáne «Eýrazııa birinshi» arnasynyń kórsetken aqparattyq qoldaýy boıynsha júzege asqan. Elimizdiń eń ózekti máselesi – qazaq tiliniń shyn máninde memlekettik til mártebesine jete almaýy. Keleli máseleni sheshýde erekshe eren eńbek sińirgen osy telejoba bolsa kerek. Elbasymyzdyń talaı ret tuǵyrda turyp «Qazaqstannyń bolashaǵy – qazaq tilinde!» degen sózin uran etip, «Eýrazııa birinshi» arnasy boıynsha baǵdarlama til úırenýshi kórermen qaýymǵa jol tartty. Jobaǵa qatysqan 10 azamat bar-joǵy 30 telesabaqta qazaq tilin meńgerip shyqty. Atalmysh baǵdarlamada til úırenýshiler úshin Qazaqstan halqy Assambleıasy arnaıy ázirlegen «Tildaryn» ádistemesi boıynsha oqytyldy. Jobaǵa qatysqan 10 azamat baǵdarlama barysynda 300 sóz jáne 50 sóz ıirimin úırendi. Múlde qazaq tilin bilmegen olar búginde erkin sóılesedi. Olarǵa ustazdyq etip, telesabaqtardy júrgizgen Qazaqstan Respýblıkasy bilim berý isiniń úzdigi, «Tildaryn» keshendi ádistemesiniń avtory Sara Jumanova.
Saltanatty keshte «Qazaqstannyń bolashaǵy – qazaq tilinde!» jobasyna qatysqan 10 azamatqa til úırený kýrsynan ótkendikteri týraly sertıfıkattar tabystaldy.
Jobaǵa qatysýshy Aleksandra Romanova men Qanat Satybaevqa sertıfıkattardy tabystaı otyryp «Jýrnalıstıka jáne saıasattaný» fakýltetiniń dekany Qaırat Saq: «Ataqty Alashorda kósemi Ahmet Baıtursynovtyń: «Tili joǵalǵan jurttyń ózi de joǵalady» degen sózi bar. Elbasy óziniń Joldaýynda 2020-shy jyly halyqtyń 95 paıyzy qazaq tilinde sóıleıdi dep qadap aıtty. Bul bizge júktelgen úlken jaýapkershilik. Osyndaı ózekti máseleniń ótkir sheshimin taýyp, jobaǵa qoldaý kórsetken «Eýrazııa birinshi» arnasyna rızashylyǵymyzdy bildiremiz. Al búgingi marapattaý saltanaty bizdiń fakýltette ótip jatqany bizge de úlken mártebe», – dep izgi nıetin bildirdi. Al, kelesi qatysýshylar Alena Baıanbekova men Hasan Sharıpovty jýrnalıst, «Bas redaktorlar klýby» qoǵamdyq birlestiginiń prezıdenti Kenjebolat Joldybaı marapattady. Ol: «Adam jańa bir tildi meńgerip, bilgen saıyn tanym kókjıegin de keńeıte túsedi. Sondyqtan, tildi úırengenderińiz eń aldymen, ózderińiz úshin úlken jetistik», – dep ulaǵatty ustaz S.Jumanovaǵa rızashylyǵyn bildirdi. Mádenıet jáne aqparat mınıstrligi janyndaǵy Til komıtetiniń basqarma basshysy Serik Jaqsylyquly Karına Kýmarova men Olga Bykovskaıaǵa sertıfıkattardy tapsyrdy. Barlyq qatysýshylar qazaq tilinde oılaryn erkin jetkizip, alǵystaryn bildirip jatty. Sóz kezegin alǵan Sara Jumanova: «Bul baǵdarlama arqyly qatysýshylar tildi 3 aptada meńgerip shyqty. Baǵdarlama án aıtýmen bastalyp, qatysýshylardy tildik kedergiden ótkizdi, ekinshiden, emosıonaldyq-psıhologııalyq jaǵdaıdyń qolaılylyǵynan olardyń sabaqta oılaryn emin-erkin bildirýine jáne qarym-qatynas jasaýlaryna múmkindik týǵyzyldy. Jańa ınnovasııalyq ádisteme boıynsha qazaq tili grammatıkasy fýnksıonaldyq turǵydan usynyldy. Iаǵnı, tildi meńgerý úshin jıilik negizinde 300 leksıkalyq mınımým jáne 15 grammatıkalyq qurylym ǵana bilý shart eken. Osy ustanym boıynsha jumys istep, onyń tıimdi ekenin biz dáleldep shyqtyq», – dep qatysýshylarǵa alǵysyn bildirdi.
Baǵdarlamaǵa qatysqan 10 azamat ultyna, jas erekshelikterine, qyzmetine qaramastan qazaq tilin meńgerip shyqty. Qatysýshylardyń biri Hasan Sharıpov: «Tildi úırený eshqashan da kesh emes eken!» dep oı túıdi.
Nurzada KÚMISBEK,
L.N.Gýmılev atyndaǵy Eýrazııa ulttyq ýnıversıtetiniń stýdenti.
