Jemqorlar sany azaıyp keledi

Saıasat • 14 Qańtar, 2021

Jemqorlar sany azaıyp keledi

Qorǵanys vedomstvosynda komıssııa tóraǵasy, Qorǵanys mınıstriniń orynbasary general-leıtenant Tımýr Dándibaevtyń basshylyǵymen Qarýly Kúshterdegi sybaılas jemqorlyqqa qarsy is-qımyl jónindegi komıssııa qyzmetiniń qorytyndysy shyǵarylyp, aldaǵy jylǵa arnalǵan jospar bekitildi. Otyrys beınekonferensııa rejiminde ótti.

Raýan QABIDOLDIN

Mınıstrdiń orynbasary Qarýly Kúshterdiń basshylyǵy sybaılas jemqorlyqtyń aldyn alýǵa jáne áskerı ortada sybaılas jemqorlyqqa qatysty quqyq buzýshylyqtardy erte anyqtaýǵa kóp kóńil bóletinin jetkizdi. Búginde buǵan deıin qabyldanǵan sharalar oń nátıjesin berip, keıingi 2-3 jylda bıýdjet qarajatynan mıllıondaǵan teńge jymqyrý sııaqty jemqorlyq qylmystaryna jol berilgen joq.

Nátıjesinde, byltyrǵy jyldy 2019 jylmen salystyrǵanda Qarýly Kúshterde sybaılas jemqorlyq qylmystarynyń deńgeıi tómendedi. Sondaı-aq osyndaı qylmystary úshin sottalǵandar sany 39%-ǵa kemidi.

Qarýly Kúshterde sybaılas jemqorlyqtyń aldyn alý maqsatynda komıssııa 350-den astam tekserý uıymdastyryp, 8000-ǵa jýyq is-shara ótkizdi. Áskerı bólimderdiń qolbasshylyǵyna sybaılas jemqorlyqpen quqyq buzýshylyq jasaýdyń alǵysharttaryn joıý týraly 53 usynys, 36 aqparattyq hat engizildi. Bul rette 124 laýazymdy tulǵanyń tártiptik jaýapkershilikke tartylǵanyn da aıta ketý qajet.

Komıssııa áskerı qyzmetke shaqyrý, memlekettik qyzmetter kórsetý, memlekettik satyp alýdy júzege asyrý, jeke quramdy tamaqtandyrýdy uıymdastyrýdy baqylaý, kúrdeli qurylys júrgizý, turǵyn úıdi bólý salalarynda sybaılas jemqorlyq táýekelderin joıý boıynsha 100-den astam usynys ázirledi.

Budan bólek, komıssııa desanttyq-shabýyldaý áskerleri qolbasshysynyń basqarmasynda jáne áskerlerdi ornalastyrý bas basqarmasynda sybaılas jemqorlyq táýekelderine ishki taldaýlar júrgizdi. Sonyń nátıjesi boıynsha, áskerı basqarý organdaryna baǵynysty bólimshelerde jemqorlyq jasaýǵa yqpal etetin sebepter men jaǵdaılardy joıý jóninde 44 usynym ázirledi. Komıssııanyń usynymy boıynsha áskerı polısııa Bas basqarmasynyń qurylymynda sybaılas jemqorlyqqa qarsy is-qımyl jónindegi ishki qaýipsizdik mindetteri bar basqarma jumysy qalpyna keltirildi.

Sybaılas jemqorlyqqa qarsy is-qımyl agenttigimen yntymaqtastyq týraly memorandým sheńberinde komıssııa jergilikti áskerı basqarý organdarynyń qyzmetindegi sybaılas jemqorlyq táýekelderine syrtqy taldaý júrgizýge bastama jasady. Memlekettik qyzmetterdi kórsetý úderisterin ońtaılandyrý jáne avtomattandyrý boıynsha 7 jol kartasy iske asyrylýda. Qyzmet kórsetý merzimi 15 jumys kúnnen 5 jumys kúnge deıin qysqartyldy jáne azamattar usynatyn qujattar paketi azaıtyldy. Jergilikti áskerı basqarý organdarynda «Qarýly Kúshter – Adaldyq alańy» atty 38 jobalyq keńse ashyldy. Atalǵan keńselerge kez kelgen azamat shtattan tys jaǵdaı týyndaǵan jaǵdaıda kómek alý úshin júgine alady.

Sybaılas jemqorlyqqa «múlde tózbeý» ahýalyn qalyptastyrý maqsatynda áskerı qyzmetshilerdiń barlyq sanattary úshin oqý modýlderi men ahýaldyq keıster ázirlenip, engizildi. Áskerı bólimderde ofıserler jınalystarynyń jumysy qalpyna keltirildi. Onda ofıserler arasynda etıkalyq minez-qulyq normalaryn buzý faktileri qarastyrylyp, olardyń zańsyz áreketterine baǵa beriledi. Áskerı qyzmetshilerdiń qyzmettegi jáne turmystaǵy laıyqsyz minez-qulqyna qoǵamdyq yqpal etý máselesi qarastyrylady.

Qarýly Kúshterde sybaılas jemqorlyqtyń aldyn alý maqsatyndaǵy jumystar aldaǵy ýaqytta da jalǵasa bermek. Osyǵan baılanysty, komıssııanyń bıylǵy jumys josparyna 37 is-shara engizildi. «Áskerı qyzmet jáne áskerı qyzmetshilerdiń mártebesi týraly» zańǵa birqatar tolyqtyrý engizý josparlanǵan.

Qorǵanys vedomstvosynda Sybaılas jemqorlyqqa qarsy komıssııanyń erekshe mártebesi berilgenin eske salý qajet. Endi ol keshendi taldaý jumysymen, sonymen qatar sybaılas jemqorlyq kórinisterin boldyrmaıtyn qyzmetti uıymdastyrýdyń jańa nysandaryn engizýmen aınalyspaq. Osyǵan uqsas komıssııalar garnızondarda da jumys isteıdi. Oǵan quqyq qorǵaý jáne arnaıy organdar qyzmetkerleri, sondaı-aq qoǵam ókilderi qatysa alady.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz