Atyraý oblysy Jaıyq ózeni jaǵalaýyndaǵy jer telimderi keıbireýlerdiń alaıaqtyq jolmen aqsha tabý kózine aınalǵan. Jergilikti tabıǵat qorǵaý prokýratýrasy oblys ortalyǵy aýmaǵyndaǵy eki telimdi, ıaǵnı 7 gektarǵa jýyq jerdi zańsyz satyp, saýdalaǵan derekti áshkereledi. Bul týraly «Astana» telearnasy habarlady.
Atalǵan jer telimi qalanyń qaq ortasynda qorǵaýǵa alynǵan sý beldeýinde ornalasqan. Prokýrorlardyń deregine júginsek, jer telimi 2011-2012 jyldary Atyraý qalasy ákiminiń sheshimimen qurylys kompanııasyna berilgen eken. Mamandandyrylǵan aýdanaralyq ekonomıkalyq sot sol sheshimdi zańsyz dep taýyp otyr. Alaıda, soǵan qaramastan atalǵan jaýapkershiligi shekteýli seriktestik basshylyǵy jalǵan qujat jasap, jer telimin satyp jibergen. Keıin de jer teliminiń ıesi birneshe ret ózgerip, sońǵy ret osy jyldyń kókteminde saýdalanǵan. Al jalǵan qujatty ádilet basqarmasy tirkeýge alǵan. Qazir osy derek boıynsha qylmystyq is qozǵaldy. Bul bylyqqa qandaı memlekettik organ mamandarynyń qatysy baryn tergeý áshkereleıdi.
«Aıypker zańsyz jer telimin satý arqyly 90 mln teńge alǵan. Jalpy,tekserý barysynda bul jer telimderiniń Atyraý qalasynyń ádilet basqarmasynda tirkelgeni anyqtaldy. Qazirgi ýaqytta qylmystyq is boıynsha tergeý amaldary júrgizilýde»,-deıdi Atyraý oblysy mamandandyrylǵan tabıǵat qorǵaý prokýrorynyń orynbasary Bahtııar Toǵyzbaev.
Telearna Jaıyq ózeni jaǵalaýynda qorǵaýǵa alynǵan sý beldeýindegi jer telimin Úndi azamatyna zańsyz saýdalanyp ketkeni jaıly da habarlaǵan edi. Negizi, elimizde 5 jylǵa ýaqytsha turýǵa ǵana ruqsaty bar Úndi azamatyna jer telimi zańsyz satylǵan kórinedi. Osy aqparattan keıin tabıǵat qorǵaý prokýrorlary ózen jaǵalaýyna tekseristi bastady. 14 sotyq jerdi berý týraly sheshimge 2012 jyldyń tamyzynda qalanyń eks-ákimi Asqar Kerimov qol qoıǵan. Al sheteldik qonaq ol jerge qonaq úı men meıramhana keshenin turǵyzý úshin qorshaýǵa alǵan eken. Endi atalmysh jer ýchaskesi memleketke qaıtarylýy bek múmkin. Atyraý qalasynyń ákimi Serik Aıdarbekov shahardyń áleýmettik-ekonomıkalyq damýyna arnalǵan brıfıng barysynda telearnanyń aımaqtaǵy tilshisi saýalyna osylaı dep jaýap beripti.
Baqytbek Keneshuly.
Derekkóz: «Astana» telearnasy
