Sandýǵash Ábilhasymqyzy bul kásippen aınalysýdy 2018 jyly bastap, bastapqy ýaqytta konfettiń 3-4 túrin shyǵarǵan. Ádepkide daıyn ónimderdi aýdan ortalyǵyndaǵy saýda núktelerine ótkizipti. Keıin bul konfettiń dámin tatqan jandardan suranys kóbeıip, tipti kórshi aýdandardan da tapsyrystar túsip, ónim túrlerin kóbeıtýdi josparlaıdy.
Qazir bul otbasylyq kásipke aınalǵan. Jeke kásipkerdiń qyzy Merýert Temirbaı ótken jyly «Bastaý-Bıznes» jobasy boıynsha oqý kýrsynan ótip, 555 600 teńge grant ıegeri atanypty. Bul qarjyǵa konfet shyǵarý sehyna qajetti qural-jabdyqtardy satyp alǵan.
Shaǵyn sehtaǵy 3 maman kúnine 100-150 keli konfet túrlerin daıyndaıdy. Sandýǵash Ábilhasymqyzy aldaǵy ýaqytta konfet túrlerin 1 kelilik daıyn qaptamalarda shyǵarýdy josparlap otyr.
