Úkimet basshysy ınvestısııalyq jobalardyń — «Kerýen-saraı» kópfýnksıonaldy týrıstik kesheniniń, JCI halyqaralyq standarty boıynsha salynyp jatqan 570 tósek ornyna shaqtalǵan kópbeıindi aýrýhananyń (2022 jyldyń jazynda paıdalanýǵa berý josparlanyp otyr), Qazaq drama teatrynyń, oblystyq ǵylymı-ámbebap kitaphananyń, Tuńǵysh Prezıdent saıabaǵynyń, dendropark pen botanıkalyq baqtyń iske asyrylý barysymen tanysty.
Sondaı-aq A. Mamın paıdalanýǵa berilgen «Hampton» qonaq úıi men Halyqaralyq týrızm ýnıversıtetin aralap kórdi. Premer-Mınıstr óńirdiń áleýmettik-ekonomıkalyq damýy jáne bıyl kóktemde Túrkistan qalasynda ótkizý josparlanyp otyrǵan Túrkitildes memleketterdiń yntymaqtastyq keńesiniń sammıtine daıyndyq máseleleri jóninde keńes ótkizdi.
Úkimet basshysynyń qatysýymen Túrkistan oblysynyń ákimdigi, «Artel Electronics» ózbek kompanııasy jáne «Orbis Kazakhstan» JShS arasynda yntymaqtastyq týraly kelisimge qol qoıyldy. Qujat óńirde as úı plıtalary men elektr sý jylytqyshtaryn shyǵaratyn zaýyt salýdy kózdeıdi. Qýattylyǵy – jylyna 1 mln birlik tehnıka. Josparlanǵan ınvestısııa kólemi – 36 mlrd teńge. Kásiporyn 2100 jańa jumys ornyn qurýdy qamtamasyz etedi.
2020 jyly Túrkistan qalasynyń negizgi kapıtalyna salynǵan ınvestısııalar 2019 jylmen salystyrǵanda 3,8 ese ósip, 367,6 mlrd teńgeni qurady. Investısııalardyń negizgi úlesi týrızm, logıstıka jáne jyljymaıtyn múlik salalaryna baǵyttaldy. Túrkistan oblysynyń negizgi kapıtalyna salynǵan ınvestısııalar 2020 jyly 703,3 mlrd teńgege jetti (+60%). Qurylys jumystarynyń kólemi 65,8%-ǵa 299,9 mlrd teńgege deıin ulǵaıdy. Oblys ınvestısııalardyń ósý qarqyny jáne jalpy óńirlik ónimniń ósýi boıynsha jetekshi pozısııaǵa ıe boldy.
