Bıylǵy jyldyń 9 aıynda Shyǵys Qazaqstan oblysynda sybaılas jemqorlyqqa baılanysty 102 qylmys tirkeldi. Bul týraly Altaynews.kz habarlady.
Korrýpsııaǵa qatysty qylmystardyń birqataryn oblystyq ishki ister departamentiniń qyzmetkerleri jasaıtyny málim boldy.
Oblystyq máslıhattyń kezekti HVII sessııasynda sybaılas jemqorlyqqa baılanysty qylmystardyń ótken jyldyń osy kezeńimen salystyrǵanda 66 paıyzǵa artqany aıtyldy. Derekke júginsek, 2013 jyldyń alǵashqy 9 aıynda polıseıler qolymen jasalǵan 17 qylmys áshkerlengen. Sondaı-aq, sot aktilerin oryndaý departamenti (7 derek) men qylmystyq atqarý júıesi departamentiniń (3 derek) qyzmetkerleriniń de bylyǵy áshkere boldy.
Osy jyldyń 9 aıynda sybaılas jemqorlyqqa qatysty tártiptik jaýapkershilikke 96 laýazymdy tulǵa tartylypty. Olardyń ishinde kommýnaldyq sharýashylyq jáne qurylys salasynyń 16 mamany, 15 aýdandyq jáne aýyldyq ákimdikter qyzmetkeri, 14 mektep dırektory bar. – Korrýpsııamen kúres baǵytyndaǵy aqparattyq-nasıhattyq jumystardy shıratyp, túsindirme semınarlaryn jıi ótkizý kerek. Ondaı jıyndarǵa quqyq qorǵaý, prokýratýra organdarynyń jáne bıznes qurylymdarynyń ókilderin kóptep tartqan jón. Kásipkerlikti damytýǵa tusaý bolyp otyrǵan túrli ákimshilik kedergilerdi azaıtýǵa osyndaı birlesken is-sharalardyń da tıgizer paıdasy mol, – dedi jıyn barysynda aımaq basshysy Berdibek Saparbaev.
Baqytbek Keneshuly.
Derekkóz: Altaynews.kz
