Táýelsizdik kúni qarsańynda «Qazmunaıgaz» barlaý óndirý» kompanııasy mańǵystaýlyq munaıshylarǵa keremet tartý jasady. «Qarajanbas» ken ornynda elimizde teńdesi joq tehnıkalyq óndiristik baza ashyldy. Bul týraly «Habar» telearnasy habarlady.
Osy atalǵan baza aımaqtaǵy barlyq munaı-gaz óndirýshi kompanııalarǵa joǵary deńgeıdegi tehnıkalyq qyzmet kórsetýge daıyn. Munda Memleket basshysynyń tapsyrmasymen byltyr qurylǵan «Tehnologııalyq kólik jáne uńǵymalarǵa qyzmet kórsetý basqarmasy» seriktestiginiń jumyskerleri eńbek etetin bolady.
Jańa ashylǵan óndiristik bazada bir mezgilde 250 avtokólik pen arnaýly tehnıkaǵa sapaly qyzmet kórsetiledi. Naqty aıtqanda, sońǵy úlgidegi qural-jabdyqtardyń kómegimen tehnıkalarǵa dıagnostıka jasalyp, kúrdeli degen aqaýlar qalpyna keltiriledi. Sonymen birge, avtomattandyrylǵan qurylǵy lastanǵan kólikterdi áp-sátte jýyp-shaıyp, tolyq tazartyp shyǵady eken.
Jóndelýge ákelingen kólikter úshin aýmaǵy 3 myń sharshy metrdi quraıtyn jyly garajdar salynǵan. Tehnologııalyq kólik sehynyń bastyǵy Berdihan Areshovtiń aıtýynsha, munda jumys isteıtin mamandar ózge qalalardaǵy osyndaı bazaǵa baryp tájirıbe jınaqtaǵan. Sondyqtan basshylar jumysta qıyndyq týyndamaıtynyna senimdi bolyp otyr.
«Byltyr jáne bıyl munda kóp jumystar atqaryldy. Kóptegen tehnıkalar alyndy. Myńdaǵan munaıshy jumysqa ornalasty. Qalamqas jáne Qarajanbas ken oryndarynda vahtalyq poselkeler salyndy. Munaıshylar tolyqtaı jumyspen qamtamasyz etildi. «Qazmunaıgaz» barlaý óndirý» kompanııasy dál osyndaı bazany bolashaqta Jańaózende salýdy josparlap otyr» ,-deıdi Mańǵystaý oblysynyń ákimi Alık Aıdarbaev.
Baqytbek Keneshuly.
Derekkóz: «Habar» telearnasy
