Áneýgúni áleýmettik jelilerde keńinen taraǵan Qazaq sport jáne týrızm akademııasynyń prezıdenti Qaırat Zakırıanovtyń ań-qustardyń tulyptaryna toly keńsesiniń fotosýreti kópshiliktiń nazaryn aýdardy. Bul jaıt oqý orny basshysymen birge túsken sýretin áleýmettik jelige júktegen sportshy Janqosh Turarovtyń paraqshasynan taraǵan bolatyn. Shamasy, jas sportshy da, synǵa ilikken sport jáne týrızm akademııasynyń jetekshisi de oqıǵanyń sońy bulaı beleń alatynyn ańdamaı qalsa kerek. Jeli qoldanýshylary, ásirese «Qyzyl kitapqa» engen qar barysynyń terisine baılanysty tıisti vedomstvonyń túsindirme berýin talap etti.
Al atalǵan keleńsiz kóriniske qatysty aqparat quraldaryna ashyq suhbat bergen Q.Zakırıanov bul barystyń shynaıy terisi emes, bar bolǵany bederin dál bergen jasandy dúnıe ekenin aıtyp aqtaldy. Sondaı-aq ol Almaty qalasyndaǵy keńsede turǵan kóz jaýyn alatyn qymbat ań terileri men tulyptarynyń ózi zańdy negizde ańshylyqtan túsken oljalary ekenin jetkizdi. Onyń aıtýynsha, qar barysynyń jasandy terisin týǵan kúnine syılaǵan kórinedi. Al qar barysynyń qasynda turǵan sileýsin de syıǵa tartylǵan eken. Dese de akademııa basshysy sileýsinniń «Qyzyl kitapqa» kirmeıtin jyrtqysh ekenin aıtady. Budan ózge onyń kolleksııasynda 30 shaqty ań tulyptary ár qurlyqtan jınalǵan, sonyń ishinde Afrıka, Aýstralııa men Jańa Zelandııadan aýlanǵan eken. Máselen, úsh jyl buryn Ońtústik Afrıka Respýblıkasynyń úkimetinen satyp alǵan lısenzııa boıynsha arystandy atyp alǵanyn maqtanyshpen aıtady. Tipti ańqumar otandasymyz afrıkalyqtardyń osy arqyly aqsha taýyp otyrǵanyn, alaıda zań boıynsha atalyǵyn ǵana atýǵa ruqsat beretinin táptishtep túsindiredi. Iаǵnı bul ańdar áıteýir bir kúni óz ajalynan óledi, áıtpese basqa bir jyrtqyshtyń jemi bolady. Sondyqtan bul áreketin qatygezdikke balamaıtynyn jetkizedi. Ańshylyq qumarlyǵyn fılosofııamen astastyrǵan onyń taǵy bir ýáji – tulyptar men terilerdiń óz menshiginde emes, akademııa ıeligine jatatyny. Iаǵnı dırektorlar keńesiniń arnaıy sheshimimen akademııany nasıhattaý maqsatynda, talapkerler tartý oraıynda qarajat bólinetinin, al ózi – tek oryndaýshy ǵana kórinedi. «Máselen, shartty túrde bıyl zoomýzeıge arnalǵan jádigerlerdi tolyqtyrý úshin 10 mln teńge bólýge dırektorlar keńesi sheshim shyǵarady, osy ispen men shuǵyldanamyn», deıdi Q.Zakırıanov.
Bul oljanyń barlyǵy kásibı baǵdarlaý negizinde alynǵanyn alǵa tartqan akademııa basshysynyń aıtýynsha, árbir ýnıversıtettiń óziniń brendi, hobbıi bolǵandyqtan, Sport jáne týrızm akademııasynyń kózdegen maqsat-muraty da jabaıy tabıǵatqa, qorshaǵan ortaǵa, týrızmge nazar aýdartý. Al qarý-jaraqqa qatysty kez kelgen tekserý organynyń ókili kelse de ruqsatnama qujattary ázir ekenin, bári zańdy ekenin aıtady.
Bul rette Ekologııa, geologııa jáne tabıǵı resýrstar mınıstrliginiń baspasóz hatshysy Samal Ibraeva vedomstvoǵa qarasty Orman sharýashylyǵy jáne janýarlar dúnıesi komıtetiniń Almaty oblysy boıynsha aýmaqtyq ınspeksııasynyń óte sırek kezdesetin jáne joǵalyp ketý qaýpi bar qar barysynyń terisi belgileri boıynsha joǵaryda aıtylǵan aıǵaqqa quqyq qorǵaý organdarynan tekserý júrgizýdi suraǵanyn habarlady.
«Túlki túginen jazady» degendeı, baǵaly ań terilerine áýestik burynnan bar. Degenmen tabıǵatty qorǵaý boıynsha qurylǵan qoǵamdyq qozǵalystar bul qaǵıdatty ózgertýge kúsh salyp kele jatqany aıan. Áıtpese toqsanynshy jyldarda aıý men qasqyr sııaqty ań terileri qazaqstandyqtar arasynda da sánge aınalǵany belgili. Búgingi tańda bul úrdiske qarsylyq bildirýshilerdiń qatary kóbeıip kele jatqany qýantady. Qolda bar altynnyń qadirin bilgen abzal. Ásirese qorshaǵan ortanyń bólinbes bólshegi – tiri jan ıesine... Al Qazaq sport jáne týrızm akademııasyndaǵy taksıdermııa úlgileriniń zańdylyǵy aldaǵy ýaqytta anyqtalady.
