Jeltoqsannyń 13-i kúni Búkilálemdik boks serııasynyń (WSB) tórtinshi týrynda Astana Arlans Kýbanyń Cuba Domadores komandasyn qabyldap, 2:3 esebimen utylyp qaldy.
Jeltoqsannyń 13-i kúni Búkilálemdik boks serııasynyń (WSB) tórtinshi týrynda Astana Arlans Kýbanyń Cuba Domadores komandasyn qabyldap, 2:3 esebimen utylyp qaldy.
Birinshi urysta Mıras Jaqypov Herardo Servantesti utyp, kýbalyqtardyń birinshi jeńilisin tirkedi. Máseleniń mánisi mynada, Bostandyq aralynyń komandasy buǵan deıin ótkizgen úsh matchyn da 5:0 esebimen aıaqtap, birde-bir jekpe-jekte qarsylastaryna ese bere qoımaǵan edi. Sol seńdi bizdiń boksshy buzdy.
Biraq budan keıingi úsh shaıqasta kýbalyqtardyń aıdyny ozdy. Atap aıtqanda, Jandos Momynov Lazaro Alvareske, Baqytjan Qojabekov Arıspoıdıs Despaınǵa, al horvatııalyq legıoner Hrvoe Sep óz kezeginde Sezar de la Krýsqa tize búkti. Meımandar sapyndaǵy joǵarydaǵy úsh boksshy da bıyl Almatyda ótken álem chempıonatyna qatysqan bolatyn. Úsheýi de fınalǵa deıin jetti. Solardyń ekeýi – Lazaro Alvares pen Hýlıo Sezar de la Krýs chempıon atandy. Ekeýi de bul ataqqa 2011 jylǵy Bakýden keıin qatarynan ekinshi ret qol jetkizdi. Al Arıspoıdıs Despaın Almaty fınalynda bizdiń Danııar Eleýsinovten utylyp qaldy. Osy joly kýbalyq bizdiń Baqytjandy nokaýtpen utty. Sonymen, matchta qonaqtardyń komandalyq esepte jeńiske jetkenderi belgili boldy.
Sońǵy aıqasta kelesi horvat jigiti Fılıp Hrgovıch qarsylasy Hose Anhel Lardýetti úshinshi raýndta jeńdi. Ol alǵashqy eki raýndta aıqyn basym kórindi. Úshinshi raýndta eki ret nokdaýnǵa jiberdi. Osydan keıin kýbalyq bapkerler óz jigitterin sharshy alańnan shyǵaryp aldy.
Osylaısha, esep 3:2 bolyp, Cuba Domadores boksshylarynyń paıdasyna sheshildi.
Damır QOJAMQUL.
