Degenmen qoǵamda jeke kásipkerdiń jolyn kesetin, el ishindegi iskerliktiń ilgerleýine kedergi keltirýshiler de kemimeı tur. Atap aıtqanda, kásipkerlerdiń múddesin qorǵaıtyn uıymdar bıznestiń damýyna barynsha qarsy bolatyn kertartpa kózqarastaǵy kisilerdiń hám toptyń baryn joqqa shyǵarmaıdy eken. Mundaı áreketterdiń artynda jeń ushynan jalǵasqan jemqorlyq pen jeke múddeni kózdeýshilerdiń turǵany da jasyryn emes. Mysaly, ótken jyly Almaty oblysynda kásipkerlerdiń quqyǵyn aıaqqa taptaýdyń kesirinen bıznes 1,2 mlrd teńge zııan shekken.
– Aımaqtaǵy bıznestiń túıtkildi máseleleriniń qatarynda memlekettik satyp alý men jer qatynastary salasy, memlekettik organdardyń is-áreketterine shaǵymdar, salyq, agroónerkásiptik keshen salasyndaǵy keleńsiz áreketterdi ataýǵa bolady. О́tken jyly bizdiń palataǵa kásipkerlerdiń quqyǵyn qorǵaý boıynsha zańdy tulǵalardan 233 ótinish kelip tústi, onyń 88-i oń sheshimin tapty. Byltyr bizdiń qoldaýymyzdyń arqasynda bıznes quqyǵy jalpy somasy 1,2 mlrd teńgege qorǵaldy, bul 2019 jylmen salystyrǵanda eki ese kóp, – deıdi oblystyq Kásipkerler palatasynyń basshysy Áset Shaıahmetov.
Daýly máselelerdi sheshýge palata ókilderi úshinshi tarap retinde qol ushyn sozyp otyr eken. Máselen, byltyr zańgerler sotta «ALSAD Qazaqstan» JShS quqyǵyn qorǵap, sotqa júgingen. Kompanııa sottan memlekettik organnyń áreketin zańsyz dep tanýdy jáne 2020 jylǵy naýryzdan mamyrǵa deıin taǵamdyq taýyq jumyrtqasy óndirisiniń qunyn arzandatýǵa ótinimder qabyldaý jáne sýbsıdııalar tóleý boıynsha buzylǵan quqyqtaryn qalpyna keltirýdi talap etken. Isti qaraǵan sot kásiporynnyń 56 mln teńge kólemindegi talap-aryzyn qanaǵattandyrý týraly sheshim shyǵarypty. Sondaı-aq palata sarapshylarynyń qatysýmen 243 normatıvtik-quqyqtyq aktiler qaralyp, tıisti sheshimin taýypty.
Jalpy, ótken jyly Almaty oblysynda 16 myńnan astam kásipker servıstik qyzmet pen keńes alǵan eken. Onyń ishinde bıznesti qarjysyz qoldaý baǵytyndaǵy jumys qarqyndy júrgizilipti.
– Biz byltyr óńirdiń 16 myńnan astam kásipkerine 17,5 myń servıstik jáne konsýltasııalyq qyzmet kórsettik. Kásipkerler, negizinen, jeke kásipkerlik ashý, bıznes-jospardy ázirleý, býhgalterlik esepti tapsyrý sııaqty qyzmetterge kóp júgindi. Bizdiń palatanyń aralasýymen 1,3 myń joba memlekettik qoldaý quraldary aıasynda qarjylandyryldy. Sondaı-aq menedjerlerimiz jalpy somasy 50 mlrd teńgege jýyqtaıtyn 529 bıznes-jospar ázirledi. Onyń ishinde 5,2 mlrd teńgeniń 153 jobasy iske asty, – deıdi Áset Shaıahmetov.
Almaty oblysy
