Onlaın-otyrys barysynda Anar Jaıylǵanova Iаkýp Berıshke syndarly yntymaqtastyǵy úshin alǵys aıtyp, ótken jyly birlesken kúsh-jigermen júzege asyrylǵan jumystardyń nátıjelerine toqtalyp ótti.
«BUU DB-nyń qoldaýymen ótken jyly memlekettik qyzmet kórsetý sapasyn anyqtaý, memlekettik qyzmetshilerdiń etıkalyq deńgeıin qoǵamnyń qabyldaýy, iQyzmet platformasynyń qanatqaqty nusqasyn ázirleý baǵytynda semınarlar men zertteýler ótkizý jobalary iske asyryldy», dedi agenttik tóraǵasy.
Atap aıtqanda, BUU DB qoldaýymen memlekettik qyzmetshilerdiń ádeptilik deńgeıin anyqtaý úshin 7000 respondent jáne memlekettik qyzmetterdiń 70 túriniń sapasy men qoljetimdiligi boıynsha qyzmet alýshylardyń qanaǵattaný deńgeıin anyqtaý úshin 9181 respondentten saýaldama alynyp, nátıjesinde turǵyndardyń qanaǵattanýynyń ortasha deńgeıi 75,1 paıyzdy quraǵan.
Sıfrly formatta memlekettik qyzmetterdi alýda turǵyndarǵa praktıkalyq kómek kórsetý úshin 400 eriktiniń qatysýymen usynymdar ázirlenip, arnaıy jeli qalyptastyrylǵan.
BUU DB qoldaýymen Prezıdenttik jastar kadr rezervin, Memlekettik qyzmet isteri agenttiginiń IT-arhıtektýrasyn qurý men tehnıkalyq jabdyqtalýyn qamtamasyz etý boıynsha jobalar júzege asyrylýda.
Iаkýp Berısh agenttiktiń COVID-19 pandemııasy kezeńindegi mańyzdy úılestirýshilik ról atqaryp, memlekettik organdarmen birlese is-qımyl jasaı otyryp, tóngen syn-qaterlerge qaramastan, memlekettik qyzmet kórsetýdiń qoljetimdiligin, sapasyn jáne jedeldigin qamtamasyz etkenin atap ótti.
Turaqty ókildiń aıtýynsha, pandemııa sıfrly qyzmetterdiń mańyzdylyǵyn kórsetti. «Qazaqstan osy baǵytta jetekshi elder qatarynda eleýli ról atqarady jáne BUU DB-nyń Qazaqstandaǵy ókildigi óz tájirıbesimen bólisýge daıyn», dedi ol.
Iаkýp Berısh Memlekettik qyzmet isteri agenttigine ózara senimge, túsinistikke jáne sınergııaǵa negizdelgen tıimdi áriptestik úshin alǵysyn bildirip, onyń alǵa qoıǵan basymdyqtary eldiń turaqty damýyna baǵyttalǵan BUU DB maqsat-mindetterimen sáıkes keletinine senim bildirdi.
Onlaın otyrys sońynda Anar Jaıylǵanova agenttik BUU DB-men seriktestik kókjıegin odan ári damyta beretinin málimdedi, dep habarlady Memlekettik qyzmet isteri agenttiginiń baspasóz qyzmeti.
