Tıisinshe ótimdilikti usyný jónindegi turaqty qoljetimdi operasııalar boıynsha mólsherleme 10,00 paıyz jáne ótimdilikti alý jónindegi turaqty qoljetimdi operasııalar boıynsha mólsherleme 8,00 paıyz bolady. Sheshim ınflıasııany orta merzimdi kezeńde 4-6 paıyzdyq nysanaly dálizge qaıtarý maqsatynda qabyldanyp, táýekelder teńgeriminiń proınflıasııalyq faktorlar jaǵyna qaraı yǵysýymen negizdelgen.
«Syrtqy jáne ishki ınflıasııalyq qysym ulǵaıdy, azyq-túlik baǵasynyń odan ári kóterilý táýekeli artty, ınflıasııalyq kútýlerdiń joǵarylaýy baıqalady. Sonymen qatar elde jáne álemde koronavırýs ınfeksııasyna baılanysty belgisizdik saqtalýda. Jyldyq ınflıasııa 2020 jyldyń qorytyndysy boıynsha Ulttyq banktiń boljamyna sáıkes qalyptasyp, 7,5 paıyz boldy. Azyq-túlik ınflıasııasy álemdik baǵa men ishki óndirýshiler baǵasynyń serpinine baılanysty maıdyń, jumyrtqanyń, qanttyń jáne kókónisterdiń aıtarlyqtaı qymbattaýy nátıjesinde 11,3 paıyzǵa (j/j) deıin jyldamdady» delingen habarlamada.
Bas qarjylyq qadaǵalaýshynyń habarlaýynsha, azyq-túlik emes ınflıasııa 5,5 paıyz (j/j) bolǵan. Kıim, aıaq kıim, JJM baǵasynyń ósýi báseńdegen kezde epıdemııalyq jaǵdaıǵa, sondaı-aq qashyqtan jumys isteý jáne oqý jaǵdaıynda suranystyń saqtalýyna baılanysty dári-dármekter, úı turmysyndaǵy zattar men turmystyq tehnıkanyń baǵasy kóterildi.
«Bazalyq ınflıasııa kórsetkishteri ınflıasııalyq prosesterdiń jyldamdaýyn kórsetedi. Máselen, jemister men kókónisterdi, retteletin kommýnaldyq qyzmetter, temirjol kóligi, baılanys, benzın, dızel otyny men kómirdi qospaǵanda jyldyq kórsetkishtegi maýsymdyq taza bazalyq ınflıasııa 2020 jylǵy jeltoqsanda 7,9 paıyzǵa deıin (qyrkúıek-qazanda – 5-6 paıyz) jyldamdady. Inflıasııalyq kútýler 2020 jylǵy jeltoqsanda bir jyl buryn kútiletin ınflıasııany sandyq baǵalaý 7,6 paıyzǵa deıin azdap tómendegen kezde joǵary bolyp qalyp otyr. Qazirgi nemese baǵalardyń neǵurlym jyldam ósýin kútetin respondentterdiń úlesi 50 paıyz boldy (2020 jylǵy qarashada – 52 paıyz)» delingen habarlamada.
Usynylǵan derekte el ekonomıkasynyń 2020 jyly 2,6 paıyzǵa qysqarǵany aıtylady. Jalpy ishki ónimniń qysqarýyna taý-ken óndirisi, saýda jáne kóliktiń tómendeýi teris áserin tıgizgen. Taý-ken ónerkásibindegi quldyraý munaı men gaz kondensatyn óndirý kóleminiń tómendeýine baılanysty. Kóliktiń qysqarýyna júk aınalymy men jolaýshylar aınalymy kóleminiń tómendeýi yqpal etken.
«Ulttyq banktiń kásiporyndar arasynda júrgizgen saýaldama nátıjeleri naqty sektordaǵy ahýaldyń jaqsarǵanyn kórsetedi. 2020 jylǵy shildeden bastap iskerlik belsendilik ındeksi jeltoqsanda 49,0 tarmaqty qurap, 50 tarmaq belgisine qaraı ósýdi jalǵastyryp keledi. Kásiporyndar bıznesti júrgizý jaǵdaılarynyń jaqsarǵanyn atap ótedi – Qazaqstan ekonomıkasy boıynsha bıznes-klımat ındeksi 2020 jylǵy jeltoqsanda 4,2 (qarashada – 1,3) boldy. Pandemııa aıasynda álemdik ekonomıkadaǵy ahýaldyń nasharlaýy Qazaqstan halqynyń nomınaldy aqshalaı kirisi ósýiniń – 2020 jylǵy naýryzdaǵy 13,8 paıyzdan qarashadaǵy 2,1 paıyzǵa deıin (j/j) birtindep baıaýlaýyna da áser etti. Sonymen qatar, ınflıasııalyq prosesterdiń jyldamdaýy halyqtyń naqty aqshalaı kirisiniń tómendeýine alyp keldi (2020 jylǵy qarashada 4,8 paıyzǵa qysqardy). Osyǵan qaramastan, ekinshi jarty jyldyqta negizinen azyq-túlikti tutynýǵa jáne azyq-túlikke jatpaıtyn taýarlardy tutynýdyń álsireýine baılanysty úı sharýashylyqtaryndaǵy tutynýshylyq suranystyń birshama qalpyna kelýi baıqalady» dep jazady Ulttyq bank.
Qazirgi kezde damyǵan elderdiń ónerkásip sektory jáne Qytaıdaǵy syrtqy saýda kórsetkishteriniń odan ári ósýi álemdik ekonomıkaǵa aıtarlyqtaı qoldaý kórsete bastaǵan. Al saýda áriptes elderdegi jyldyq ınflıasııa serpini ártúrli baǵytta. 2020 jylǵy jeltoqsanda EO-da jyldyq ınflıasııa 0,2 paıyz deńgeıinde qalyptassa, Qytaıda 2020 jylǵy qarashada deflıasııadan keıin ınflıasııa 0,2 paıyzǵa deıin ósken. О́z kezeginde Reseıde ınflıasııanyń 4,9 paıyzǵa deıin údeýi baıqalady, bul azyq-túlikke álemdik baǵanyń ósýimen birge syrtqy ınflıasııalyq áserdiń artqanyn kórsetedi.
«Munaı naryǵynyń damý perspektıvalarynyń belgisizdigine qaramastan, halyqaralyq uıymdardyń sońǵy boljamdarynda kútiletin munaı tutyný boıynsha baǵalaý shamaly joǵarylady. Sonymen qatar, munaı baǵasynyń qazirgi qalpyna kelýine baılanysty munaı usynysy da ulǵaıady dep kútiledi. EIA boljamdary boıynsha 2021 jáne 2022 jyldary Brent surypty munaıdyń baǵasy tıisinshe orta eseppen barreline 52,8 jáne 53,4 AQSh dollaryn quraıdy» dep boljam jasaıdy Ulttyq bank.
