«Birinshiden, betperde kıip, adamdar kóp jınalatyn oryndarǵa barmaý, qolǵa qolǵap kııý. Úıge kelgennen keıin qoldy jýý. Adamdarmen kezdesken kezde 1,5-2 metr qashyqtyqty saqtaý qajet. Bastysy adamdar kóp toptasyp jınalatyn jerlerge barmaý kerek», deıdi Artýr Qajybaev.
«Qolǵap kııý óte mańyzdy, óıtkeni eger qolǵapsyz qolymyzda ınfeksııa bolsa, biz ony baıqamaımyz jáne avtomatty túrde betimizdi qolmen ustaımyz – solaı biz tez juqtyrýymyz múmkin. Qazirgi ýaqytta betperdeler eń mańyzdy saqtyq sharalarynyń biri bolyp tur. Adamdar bir-birimen sóılesken kezde ınfeksııa aýa arqyly taralady, sondyqtan qala turǵyndaryna betperde men qolǵap kıgen durys», dedi bas dáriger.
Esterińizge sala keteıik, Almatydaǵy indet oshaqtary týraly aqparatqa sáıkes, juqtyrý oqıǵalarynyń 39,6%-y qoǵamdyq oryndarǵa; 27,5%-y – otbasynda KVI-men aýyratyn naýqaspen qarym-qatynas jasaýǵa; 20,3%-y – kólikpen júrýge tıesili. Artýr Qajybaev KVI-den túsken adamdardy juqtyrýdyń sebepteri týraly emhana bólinisinde habarlady.
«Juqtyrý sebepterine keletin bolsaq, aldyńǵy kezekke – jańa naýqastardyń onyń aldynda indet juqtyrǵandardyń adamdarmen qarym-qatynasta bolýy shyǵyp otyr. Ekinshi orynǵa adamdar kóp jınalatyn jerlerde bolǵandar jáne qonaq shaqyryp, qonaqqa, mysaly, toıǵa barǵandar jaıǵasady. Mysaly, azyq-túlik dúkenderinen – 36%, qoǵamdyq kólikterden – 13%, bazarlardan – 12%. Bul bizdiń emhanada baqylaýǵa alynǵan 23 adamnyń juqtyrý oqıǵalary. Kóbinese indetke shaldyǵý aldyn alý sharalaryn eskermeýmen baılanysty bolyp otyr», deıdi bas dáriger.
Spıker sondaı-aq mobıldi brıgadany qandaı jaǵdaılarda dereý shaqyrý kerek degen suraqqa jaýap berdi.
«Eger JRVI belgileri – jótel, dene qyzýy paıda bolsa, onda emdelýshige emhanaǵa júginý kerek – tirkeý bólimine qońyraý shalý qajet. Tirkeý ornynda mobıldi brıgadaǵa aýystyrady, mobıldi brıgada kelip, qyzmet kórsetedi. Eń aldymen, olar (mobıldi brıgada) da qońyraý shalyp, jaǵdaıyna baǵa berip, sodan keıin kelip kómek kórsetedi. Mobıldi brıgada kelip, qarap, aýrýhanaǵa jatqyzý qajet degen belgilerdi kórse, naýqas aýrýhanaǵa jatqyzylady. Bul rette naýqas 14 kún boıy baqylaýda bolady», dep túsindirdi Artýr Qajybaev
