Aımaq basshysy Danıal Ahmetov oblys ákimdiginiń otyrysynda Shyǵys Qazaqstannyń aýdan ortalyqtaryn damytýǵa erekshe den qoıylý qajettigin aıtty.
«Ár aýdan ortalyǵy úshin jeke jospar daıyndalýy tıis. Biraq bul rette basseın men aýrýhana salyp, baǵdarlamanyń sátti júzege asyrylyp jatqandyǵy týraly esep berip otyrýdyń qajeti joq. Eń bastysy, aýdan ortalyqtary men irgeles eldi mekender turǵyndarynyń pikirin tyńdap, halyqqa naqty ne qajet ekendigin anyqtaǵan jón», dedi ol.
Búginde toǵyz aýdan ortalyǵynyń beseýi shekaralyq aýdandardy damytý baǵdarlamasyna engen. Al qalǵandary úshin naqty jospar jasalmaq.
«Osynyń nátıjesinde ortalyqtar ǵana emes, jalpy aýdandardyń nyǵaıatyndyǵy anyq. О́ıtkeni keshendi josparlardy júzege asyrý halyqtyń turmysy men ál-aýqatyn jaqsartýǵa baǵyttalady», dedi Danıal Ahmetov.
