Ekpeni eń birinshi bolyp oblys ákiminiń orynbasary Erlan Spanov, aımaqtyń bas sanıtarlyq dárigeri Ermuǵanbet Dáýletbaev, densaýlyq saqtaý basqarmasy basshysynyń orynbasary Rústem Aıtbaev jáne oblystyq jedel járdem qyzmetiniń bas dárigeri Irına Shteıgervald saldyrdy.
Alǵash ekpe alǵandardyń deni – emhana qyzmetkerleri. Vaksına salmas buryn olardyń árqaısy terapevt dárigerdiń tekserýinen ótip, kelisimin aldy. Pasıentter ekpeden shyqqan soń, arnaıy kabınetke kirip, jarty saǵat mamandardyń baqylaýynda otyrdy.
Jalpy, eki apta boıy epıdemııalyq jaǵdaıy kúrt tómendep «qyzylǵa» oranǵan Qostanaı oblysy aqpannyń alǵashqy kúni áýpirimdep baryp «jasyl» aımaqqa qaıta aýysqan. О́ńirde pandemııa bastalǵaly indet juqtyrǵan jurttyń sany 10 myńnan asyp ketti. Oblys ákimdigi janynan jumys istep jatqan jedel aqparat ortalyǵynyń málimetinshe, 2020 jylǵy 03 sáýirden bıylǵy 31 qańtarǵa deıingi aralyqta COVID-19-dyń 10309 jaǵdaıy tirkelip, 8811 naýqas emdelip shyqqan.
О́tken aptanyń aıaǵynda Qostanaıǵa koronovırýsqa qarsy 1200 ekpe vaksına jetkizilgen. Oblystyq densaýlyq saqtaý basqarmasy kelgen júkti qabyldap alyp, óńirdegi ekpe jumystaryna tartylǵan barlyq emhanalarǵa taratyp bergeni týraly málim etti.
Atalǵan basqarmaǵa qarasty dári saıasaty bóliminiń jetekshisi Gúlnar Ospanovanyń aıtýynsha, aımaq turǵyndaryna koronovırýsqa qarsy vaksına tegin ári erikti túrde egiledi. Ekpe qabyldaǵysy kelmegender jazbasha túrde bas tartýy tıis. Al 18 jasqa tolmaǵan jasóspirimder men 65 jastan asqan qart adamdarǵa vaksına salynbaıdy.
О́ńirdegi COVID-19-ǵa qarsy ekpe jumystary kezeń-kezeńimen júzege asyrylmaq. Aqpannyń alǵashqy kúni densaýlyq saqtaý salasynyń qyzmetkerleri ekpe saldyra bastady. Odan keıin araǵa 21 kún salyp naýryz aıynda muǵalimderge kezek keledi. Al sáýir aıynyń basynda jappaı tegin ekpe bastalady. Bul kezeńde árkim óz qalaýy boıynsha vaksına saldyrta alady. Al koronovırýs juqtyryp, bir aýnap shyqqandar indetten aıyqqan soń alty aı ótken soń ǵana ekpe jasata alady.
