Shtabtyq jattyǵýlar barysynda sheshim qabyldaý, operasııalardy josparlaý, áskerı basqarý organdaryn úılestirý, ózara is-qımyldy uıymdastyrý jáne is-sharalardy jan-jaqty qamtamasyz etý mindetteri oryndaldy.
«Batys», «Astana» óńirlik qolbasshylyqtarynyń basqarmasynda jáne Desanttyq-shabýyldaý áskerlerinde arnaıy áskerı operasııany ázirleý máseleleri pysyqtaldy. «Biz shtabtyq jattyǵý barysynda qazirgi zamanǵy qarýly qaqtyǵystardyń tájirıbelerin qarastyrdyq, jaýyngerlik is-qımyl barysyn jáne ushqyshsyz ushý qurylǵylarynyń ereksheligin taldadyq. Basqa áskerı qurylymdarmen ózara is-qımyl máselelerin pysyqtadyq. О́tken jattyǵýda negizgi maqsatqa qol jetkizilip, tapsyrmalar oryndaldy dep oılaımyn», dedi Desanttyq-shabýyldaý áskerleriniń qolbasshysy, general-maıor Qanysh Ábýbákirov.
Budan ózge, UQK Shekara qyzmetiniń basqarý organdarymen, IIM Ulttyq ulanmen ózara is-qımyl máseleleri pysyqtaldy. «Kez kelgen oqıǵaǵa árqashan daıyn bolý kerek. Osyndaı jattyǵýlardy ótkizý kezinde Qarýly Kúshterdiń, basqa da áskerler men áskerı quralymdardyń birlesken is-qımylynyń úılesimdiligi tekseriledi», dedi «Shyǵys» óńirlik qolbasshylyǵy áskerleri qolbasshysynyń shtab bastyǵy, polkovnık Qýanyshbek Ushtaev.
Atalǵan is-sharalar jedel qujattardy ázirleý jáne jedel-taktıkalyq esepterdi júrgizý jóninde praktıkalyq daǵdylardy damytýǵa yqpal etti. Olar biryńǵaı keshendi strategııalyq mindetter aıasynda shuǵyl ótti.
