Ahmet Baıtursynuly mýzeı-úıiniń dástúrge aınalǵan kezdesýleriniń bul jolǵy qonaǵy – Qazaqstannyń eńbek sińirgen qaıratkeri, Prezıdent syılyǵynyń jáne Halyqaralyq «Alash» ádebı syılyǵynyń laýreaty, jazýshy, jýrnalıst Qaısar Álim boldy. Ol jınalǵandarǵa halqymyzdyń uly perzentteriniń biri, ámbebap ǵalym, aqyn, aýdarmashy, kósemsóz sheberi Ahańnyń san qyrly ómiri men kúres joldarynan, shyǵarmashylyq, aǵartýshylyq eńbekterinen syr shertti. Sonaý qysyltaıań, qytymyr kezdiń ózinde M.Áýezov: «Ahań – eńbegi janǵan jannyń biri. Istegen isiniń jemisi – artynan kele jatqan jastar... Onyń arty Ahań mektebine tizilip kirip jatqan jas býyn... Qalamynan tamǵan bal em bolýdan aınymaıdy...», dep tamsana baǵalaǵan eken. Ulylardyń birin-biri aınytpaı tanıtynynyń aıǵaǵy ispetti, bul aqjarma lebiz.
– Ahań taqyrybyna árkim árqalaı keletini naqty istermen dáleldenip júr. Sonyń bir mysaly, kezinde «Egemen Qazaqstan» gazetiniń Qostanaı oblysy boıynsha menshikti tilshisi bolyp uzaq jyldar jemisti qyzmet atqarǵan, jýrnalıst, jazýshy, aqyn Baıtursyn Ilııastyń Ahań týraly «Altyn besik» («Zolotaıa kolybel») atty kitaby qazaq, orys tilinde ǵulamanyń 125 jyldyǵyna tartý retinde jaryq kórgen edi, – dedi qalamger Qaısar Álim. – «Qostanaı baspa úıinen» nebári 600 dana bop shyqty. Kitap sol zamatta sol óńirge tarap ketti. Búginde marqumnyń bul eńbegi elimizdiń kitaphanalarynan emge de tabylmaıdy. Bul kitapta Ahańnyń kindik qany tamǵan týǵan jeri, onyń qadir-qasıeti, ultshyl bozbalany úlken ómirge jetelep ákelgen tuma bastaýlar sóz bolady. Ahań shyqqan ortanyń minez-tynysy, syry shynaıy baıandalady. Sondaı-aq kitap kóptegen tyń derekterimen de qundy.
Sózin osylaısha órbitip, túıindegen Q.Álim bul kitapty mereıtoı qarsańynda mol tırajben qaıta basyp shyǵarýǵa muryndyq bolatynyn aıtty. Sondaı-aq ol mýzeı-úıdiń dırektory Raıhan Imahanbetke ult ustazynyń 150 jyldyǵyna daıyndyq is-sharalary úshin bir myń dollar syı- tartýyn usyndy jáne óziniń M.Dýlatuly týraly «Qazaǵyn oıatqan» kitabyn tabys etti. Ahań, Jaqań shyqqan óńirdiń túlegi osylaısha, olar jaıly, jalpy Alash arystary týraly udaıy qalam terbep, rýhanııatqa úles qosýymen qatar, naqty, ónegeli iske de túrtki bolǵandaı. Bıyl Táýelsizdigimizdiń 30 jyldyǵy atap ótiletin kezeńde sol qasterli egemendik úshin jandaryn pıda etip kúresken tulǵalarymyzǵa qandaı qurmet, iltıpat jasalsa da jarasty emes pe.
Nurbek SÁBITULY
Almaty
