Qundy qaǵazdar KEGOC-tyń jalpy kólemi 80 mlrd teńge bolatyn ekinshi oblıgasııalyq baǵdarlamasy oblıgasııalarynyń birinshi shyǵarylymy aıasynda ornalastyryldy. О́teý merzimi – 14,3 jyl. Saýda-sattyq nátıjesinde tartý kólemi boıynsha oblıgasııalardyń 22,6 paıyzyn brokerlik-dılerlik uıymdar, 72,8 paıyzyn basqa ınstıtýsıonaldyq ınvestorlar, 4,6 paıyzyn ózge de zańdy tulǵalar satyp aldy.
Tartylǵan qarajat «KEGOC» AQ fılıaldarynyń 220-500kV áýe jelilerin jańǵyrtý», «Qazaqstan Birtutas elektr energetıkalyq júıesi Batys aımaǵynyń elektr jelisin kúsheıtý» ınvestısııalyq jobalaryn iske asyrýǵa baǵyttalady.
«Áýelik elektr jetkizý jelilerin jańǵyrtý elektr jelileriniń senimdi jumys isteýin qamtamasyz etedi. Sondaı-aq elektr energııasyn tutynýshylar shyǵyndarynyń kólemin ońtaılandyrýǵa múmkindik beredi. Budan bólek, KEGOC qyzmetiniń tıimdiligin arttyrady. Jańa elektr jelilik nysandardy salý esebinen Qazaqstannyń Birtutas elektr energetıkalyq júıesiniń Batys aımaǵyndaǵy tutynýshylardy elektrmen jabdyqtaý senimdiligi artady», dep habarlady kompanııa.
Sondaı-aq qurylys-montajdaý jumystary kezinde qosymsha jumys oryndary paıda bolatyndyqtan, jobalardyń áleýmettik mańyzy zor. Bul óz kezeginde ekonomıkanyń naqty sektorynyń damýyna, halyqtyń jumyspen qamtylýynyń jáne ál-aýqatynyń joǵarylaýyna, bıýdjetke túsetin salyqtyq tólemderdiń artýyna oń áser etedi.
