Aldymen jabyq júzý basseınine barǵan oblys basshysy nysannyń ishki árleý jumystary men syrtqy abattandyrý, kórkeıtý isiniń egjeı-tegjeıine mán berip, nazar aýdardy. Sebebi teńdessiz nysanda usaq-túıek degen bolmaıdy.
Jobalyq quny 11,4 mlrd teńge bolatyn jabyq júzý basseıni qurylysynyń I kezeńinde memlekettik-jekemenshik áriptestik boıynsha ǵımarattyń ishi tolyqtaı salynyp bitken, qazir árleý jumystary júrip jatyr. Jaqynda basseınge sý toltyrylyp, tekserýden ótkiziledi. II kezeńi ótken jyldyń qarashasynda bastalyp, jumysshylar syrtqy abattandyrý isine kirisken. Qazir obektide 300-deı jumysshy eńbek etýde.
Oblys ákimi aldymen ǵımarattyń ishin aralap kórdi. Nysan qurylysyn júrgizgen «AVS Kórkem Qurylys» JShS dırektory Mýstafa Afraılovqa zaldardaǵy temir tirek baǵandardy aq túspen boıaýdy, sol sııaqty metall konstrýksııalar tóbeden kózge qorash kórinbeıtindeı etip, estetıkalyq talǵamǵa sáıkes keltirýdi tapsyrdy. Esik jaqtaýlarynda, plıntýsta, qabyrǵa men metall konstrýksııalarynyń jalǵasqan tustarynda eleýsiz sańylaýlardyń ózi bolmaýy kerektigin eskertti. Basseınge bıikten sekirýge arnalǵan baspaldaqtar da aq shatyrdaı bolyp alystan kóz tartyp, kórkem kórinýi tıis. Ol úshin olardy da aq túspen boıaý kerek. Baspaldaqtardyń astyndaǵy bolttar da basy artyq zattaı syrtqa shyǵyp turmaýy tıis. Osy aralaý barysynda Amandyq Batalov jarysqa arnalǵan úlken basseın alańynda qaı tustan qatysýshylardyń týlary kóteriledi, qaı jerden jeńimpazdardyń týy jelbireıdi, jarystyń marapattaý rásimi qaı jerde ótedi – barlyǵynyń oryndaryn belgilep, árleý, qurylǵylar ornatý jumystaryn soǵan sáıkes júrgizýdi tapsyrdy. Sol sııaqty qabyldaý bólmesiniń mańdaısha jazýynyń, ǵımarat ishindegi jalıýzderdiń tústeri qandaı bolatyny da aıqyndaldy.
Munan soń oblys ákimi syrttaǵy abattandyrý jumystaryna nazar aýdardy. Qazir bul jumystarǵa 60 adam tartylǵan. Taldyqorǵan qalasy ákimdigi men oblystyq sáýlet jáne qala qurylysy basqarmasyna jáne basqa da tıisti organdarǵa nysannyń aınalasyn kógaldandyrý, basseın mańaıynyń arhıtektýralyq sheshimi Qadyrǵalı Jalaırı dańǵylymen jáne Balapanov kóshesimen, sol sııaqty qatar jatqan «Jastar» saıabaǵymen úılesimdi túrde jalǵasýy kerek ekenin aıtty. Abattandyrý barysynda paıdalanylatyn shaǵyn sáýlettik formalardyń, jaryq shamdarynyń, oryndyqtardyń, gúlzarlardyń úlgileriniń jobalaryn jaqyn kúnderde kórsetýdi tapsyrdy.
Nysan mańyndaǵy aǵashtardy kespeı, olardy saqtap, retke keltirip, kók jelek otyrǵyzýdan keshigip qalmaýdy qatań eskertti.
Munan soń oblys ákimi Amandyq Batalov qaladaǵy turǵyn úıler salynyp jatqan alapqa bardy. Aldymen buǵan deıin «Báıterek» UBH» AQ bastamasymen irgesi qalanyp bastalǵan túrǵyn úılerdiń aıaqsyz turǵan qurylysyn oblys ákimdigi qarjy bólip, qurylys jumystaryn qaıta jandandyrǵan bolatyn. 6 jáne 7-shi shaǵyn aýdandarda boı kótergen jalpy sany 110 páterlik bul qos úıdi salýmen «SA NIPI TransNeft» JShS merdiger mekemesi aınalysýda. Bul jerde Amandyq Batalov kóp páterli turǵyn úıdiń birinshi qabatynan qosarlanyp turǵyzylyp jatqan keńselik ǵımaratqa nazar aýdardy. Bul nysannyń qurylys syzyǵynan asyp, qurylys normalaryn saqtamaı salynyp jatqanyna narazylyq bildirdi. Ǵımarattyń salyný barysyn baqylamaǵan, qurylys ıesine zań talaptaryn túsindirmegen qalalyq ákimdiktiń, oblystyq sáýlet jáne qala qurylysy basqarmasynyń bosań jumysyn synǵa aldy. Tıisti normalar saqtalmaı salynyp jatqan qurylysty toqtatýdy tapsyrdy.
Sol sııaqty Amandyq Batalov «Birlik» shaǵyn aýdanynda bas merdiger kompanııa «Otbasy qurylys grýpp» JShS salyp jatqan kópqabatty úılerdiń de salyný barysyn kórdi. Munda 75, 60 jáne 40 páterlik úsh turǵyn úı boı kóterýde, qurylys jumystary aıaqtalýǵa jaqyn. Atalǵan seriktestik dırektory Azız Esimhanov oblys ákimine turǵyn úıler qurylysynyń júrgizilý barysy jaıly baıandady. Bul baspanalardyń barlyǵy da halyqqa «Baqytty otbasy», «Shańyraq», «7-20-25», «5-10-20» memlekettik baǵdarlamalary boıynsha berilmek.
Amandyq Ǵabbasuly turǵyn úılerdiń eń aldymen sapaly bolýy kerektigin aıtty. Ásirese, jańadan boı kóteretin shaǵyn aýdanda salynyp jatqan úılerdiń biryńǵaı sáýlettik kelbeti, birkelki fasadtyq sheshimi bolýy kerektigin tapsyrdy.
«Taldyqorǵan – oblys ortalyǵy. Sondyqtan Taldyqorǵannyń kórkem kelbetine qala ákimdigimen birge qurylysqa jetekshilik etetin orynbasarlarym da jaýapty. Jabyq júzý basseıni qurylysyndaǵy eskertý jasalǵan tustarynyń tolyqtaı qalpyna keltirilýin qadaǵalańdar. Ol – Olımpıadalyq standarttarǵa saı jasalýǵa tıis teńdessiz nysan. Onyń qurylys jumystary tolyq aıaqtalǵansha taǵy da birneshe ret baryp, kóremin. Al turǵyn úılerdiń qarqynyn báseńdetpeı, sapaly salýdy tapsyramyn», dedi A.Batalov.
