Mektepke deıingi bilim berý
A. Aımaǵambetov atap ótkendeı, balabaqshalardyń jumysyn jetildirý aıasynda elimizde mektepke deıingi bilim berýdiń jańartylǵan memlekettik standarty, mektepke deıingi oqytý men tárbıemen qamtýdy ulǵaıtý, balabaqshalarda qolaıly jaǵdaılarmen qamtamasyz etý jáne vaýcherlik qarjylandyrýdy engizý qarastyrylǵan keshendi jospar ázirlendi.
Prezıdenttiń tapsyrmasy aıasynda mektepke deıingi mekemelerdi sýmen, ystyq sýmen jáne káriz júıesimen qamtamasyz etý úshin birqatar sharalar josparlanǵan. Bul máseleler Túrkistan, Qostanaı, Shyǵys Qazaqstan, Soltústik Qazaqstan, Batys Qazaqstan, Aqmola jáne Aqtóbe oblystaryndaǵy mekemelerde ózekti bolyp otyr. Mınıstrdiń aıtýynsha, problemalardy belgilengen merzimde sheshý qajet.
Inklıýzıvti bilim berý
Memleket basshysynyń tapsyrmasyna sáıkes, bıyl, mınıstrdiń aıtýynsha, 50 balaǵa arnalǵan 1 psıhologııalyq medısınalyq-pedagogıkalyq komıssııa (PMPK) qaǵıdaty boıynsha erekshe balalarǵa arnalǵan uıymdardy ashý normatıvteri jańartylady.
«Bıyl 46 PMPK jáne 25 túzetý kabınetin ashý qajet. Erekshe balalar úshin bul aýadaı qajet másele. Biz erekshe balalarǵa arnalǵan bilim berý máselelerin baqylaýǵa alamyz», — dep atap ótti A. Aımaǵambetov.
Búgingi tańda, onyń aıtýynsha, PMPK sanyn arttyrýǵa Túrkistan, Almaty, Qaraǵandy, Atyraý oblystary men Nur-Sultan qalasy barynsha muqtaj.
Orta bilim berý
Orta bilim berý júıesinde bıyl oqý júktemesin azaıtý, úlgilik oqý baǵdarlamalaryn jańartý máseleleri qaralatyn bolady. Oqý baǵdarlamasynda matematıka, ınformatıka jáne til pánderi basym bolady. Sonymen qatar mınıstrdiń aıtýynsha, Qazaqstan tarıhy men Dúnıejúzi tarıhy boıynsha biryńǵaı oqýlyqtardy ázirleý jáne engizý jumystary bastaldy.
Infraqurylymdyq máseleler
Bilim berý júıesinde ınfraqurylymdyq máseleler burynǵysynsha ózekti bolyp qalýda.
«Bıyl Memleket basshysynyń tapsyrmasy boıynsha tórt mehanızm aıasynda 200 mektep salý josparlanýda. Bul – memlekettik-jekemenshik áriptestikti qoldaný, modýldik qurylymdardan mektepter salý, jeke mektepter jelisin damytý jáne jańa mektepterdiń nysanaly qurylysy», — dedi A. Aımaǵambetov.
Mınıstrdiń aıtýynsha, 10 aqpanǵa deıin jergilikti atqarýshy organdarmen birlesip mektep qurylysy boıynsha Jol kartasy bekitiledi.
«Ákimderden bul máseleni bir apta merzimde jeke qarastyrýdy, óńirlik jospardy daıyndap, Mınıstrlikke usynýdy suraımyn», — dep atap ótti A. Aımaǵambetov.
Joǵary bilim berý júıesi
Mınıstrdiń aıtýynsha, joǵary bilim berý júıesinde granttar bólý máseleleri boıynsha jumys kúsheıtiledi. Memlekettik tapsyrys suranysqa ıe baǵyttarǵa bólinetin bolady, kásiptik baǵdarlaý jumysy kúsheıtiledi, kásiptik standarttar men kásipter atlasy negizinde bilim berý baǵdarlamalaryn jasaý josparlanýda.
«Joǵary bilim berý sapasyn arttyrý úshin pedagogtardy, dárigerlerdi, zańgerler men sáýletshilerdi daıarlaýǵa erekshe biliktilik talaptaryn engizý josparlanýda. Joǵary oqý oryndarynyń akademııalyq adaldyqty buzǵany jáne sybaılas jemqorlyq buzýshylyqtary úshin ákimshilik jaýapkershiligi engizilýde», — dedi A. Aımaǵambetov.
Budan basqa, lısenzııalaý jáne tekserý tártibin, zańnamaǵa ózgerister men tolyqtyrýlar engize otyryp, lısenzııalardy qaıtaryp alý rásimin ózgertý, sondaı-aq sapasyz bilim beretin joǵary oqý oryndaryn jabý josparlanyp otyr. Kolledjderge akademııalyq erkindik beriledi.
«Bul olarǵa bilim berý baǵdarlamalaryn jańartýǵa, oqytý sapasyn arttyrýǵa, oqý kezeńin qysqartýǵa jáne eńbek naryǵy úshin mamandardy jedel daıarlaýdy júrgizýge múmkindik beredi», — dep atap ótti A. Aımaǵambetov.
Sondaı-aq bıyl joǵary bilim berý júıesinde óńirlerdi qoldaý boıynsha jobany iske asyrý josparlanyp otyr.
«О́ńirlerde joǵary bilim berý sapasyn arttyrý úshin 15 óńirlik JOO irilendiriledi, oqý jáne ǵylymı zerthanalardy jabdyqtaýǵa jáne jańa bilim berý baǵdarlamalaryn ázirleýge qarjy bólindi», — dep túıindedi A. Aımaǵambetov.
