Búginde qoǵamdyq birlestik retinde Ádilet mınıstrliginiń tirkeýinen ótip, alǵashqy qanatqaqty jobalaryn jarııalap úlgergen uıymnyń on quryltaıshysy bar. Bári jıyrma men qyryqtyń aralyǵyndaǵy jastar. Atap aıtsaq, Esbolat Aıdabosyn, Aınur Tóleý, Jangeldi Nemerebaev, Azamat Nurmuhan, Asyl Sultanǵazy sekildi qyz-jigitter. Klýb músheleri de jastar, qyryq bes jasqa deıingi jas aqyn-jazýshylar qabyldanady. Bul rette Almaty oblysynyń shalǵaı aýdandarynda turatyn avtorlar da umyt qalmaıdy. Olar ádebı klýbtyń sol óńirdegi ókili qyzmetin atqarmaq.
«Janr» ádebı klýby óz jumysyn Muqaǵalı óleńimen bastady. Naqty aıtqanda, aqıyq aqynnyń 90 jyldyǵyna oraı «Muqaǵalı oqýlary» estafetasyn jarııalaǵan bolatyn. Búginde sol naýqanǵa elimizdegi birtalaı qalamger atsalysyp, áleýmettik jelide ádebı serpilis týdyrdy. Janrdyń budan bólek josparlary kóp eken. Mysaly, bıyldyń ózinde Almaty oblystyq Mádenıet, arhıvter jáne qujattama basqarmasymen birlesip onnan asa shara uıymdastyrmaq. Onyń ishinde balalar ádebıetine arnalǵan baıqaýlar ótkizý, ádebı ólketaný boıynsha kitaptar shyǵarý, aýdıo kitaptar ázirlep, ony taratý sekildi iri jobalar bar. Sonymen qatar jetisýlyq ádebıet alyptarynyń mereıtoılary da basty nazarda. Bul rette jyr alyby Jambyldyń 175 jyldyǵy, Saıyn Muratbekovtiń 85 jyldyǵy óz deńgeıinde toılanbaq. Klýb jetekshileri óńirdegi qalamgerlerdiń tanymaldyǵyn arttyrý, bilim-biligin kóterý máselesine de basa nazar aýdarmaq. Bul rette aqyn-jazýshylardyń shyǵarmashylyq keshteri men kezdesýlerin uıymdastyrý, ádebı talqy, sheberlik klass, trenıngter jasamaq.
Jalpy, sońǵy ýaqytta Jetisý ádebıetinde bir silkinis baıqalady. Jergilikti bılik te ádebıetti qoldaýda ózge óńirlerge úlgi bolarlyqtaı jumys istep jatyr. Máselen, Almaty oblysy ákimdiginiń qoldaýymen jyl saıyn qyryqqa jýyq avtordyń kitaby jaryq kóredi. Oblysta turatyn qalamgerlerdiń bir parasyna ákimniń arnaıy stıpendııasy taǵaıyndalǵan. Birer jyl buryn oblys ákimi Amandyq Batalov jas qalamgerlerge baspana syılaǵanyn da bilemiz. Bul da bolsa ádebıetke úlken qamqorlyq. Sondyqtan «Janr» sekildi ádebı birlestiktiń basqa emes, Almaty oblysynda ómirge kelýi zańdylyq ispetti. Biz óz kezeginde klýb jumysyna sáttilik tileımiz. «Janr» qalamgerlerdiń shyǵarmashylyǵyn janyr qaıraq bolsyn!
