Sh.Aımanov atyndaǵy «Qazaqfılm» kınostýdııasy túsirgen Elbasynyń balalyq, jastyq shaǵynan syr shertetin «Balalyq shaǵymnyń aspany» kórkem fılmin búkil qazaqstandyqtar bolyp, onyń ishinde Qaraǵandy oblysynyń qalyń jurtshylyǵy erekshe sezimmen tamashalaǵan bolatyn.
Sh.Aımanov atyndaǵy «Qazaqfılm» kınostýdııasy túsirgen Elbasynyń balalyq, jastyq shaǵynan syr shertetin «Balalyq shaǵymnyń aspany» kórkem fılmin búkil qazaqstandyqtar bolyp, onyń ishinde Qaraǵandy oblysynyń qalyń jurtshylyǵy erekshe sezimmen tamashalaǵan bolatyn.
Endi, mine, kınostýdııamyzdyń óz kórermenderine jol tartqan «Elbasy joly» dep atalatyn jańa týyndysyn kórgen sátten-aq odan alǵan áserim aıryqsha bolǵandyǵyn aıtar edim.
Nursultan Ábishulyn Temirtaýdaǵy óndiristegi, laýazymdyq qyzmettegi kezinen bilem desem de naqty derektermen dáıektelip túsirilgen «Otty ózen» jáne «Temir taý» taraýlarynan óreli qasıetterine odan saıyn qanyǵa tústim. Mine, týyndynyń tanymdyq ári tárbıelik bir qundylyǵy da osynda dep oılaımyn. Sol shaqta jumys babynda birneshe márte kezdesýlerde baıqaǵanymdaı aınalasyndaǵy adamdarǵa degen izgilik pen izettilik, sonyń ishinde eńbektiń ystyq-sýyǵyn birge kórýshi metallýrg áriptesterine yqylas pen qurmet fılmde shynaıy kórinis tabýy kóńil tolqytty.
Baıtaq elimizdiń túkpir-túkpirinen Qazaqstan Magnıtkasynyń qurylysyn salysýǵa kelgen komsomol-jastardyń, san ult ókilderiniń ortasynda qazaq jastarynyń da molynan bolǵandyǵyn, olardyń da qulshyna belsendilikpen eńbek etkenin bizder jaqsy bilemiz.
Fılmdegi erekshe tartymdy sátterdiń biri – bir top qazaq jastarynyń Ýkraınaǵa baryp, sol jaqtaǵy ustazdarynan metallýrgııa mamandyǵynyń qyr-syryn meńgerýi. Sonymen qosa, sondaǵy ustazdaryn búgingi kúnge deıin umytpaı árdaıym syılap júrýi, qamqorlyq jasaýy, osy jastardyń erekshe azamattyq qasıetteriniń biri. Mine, sol ýaqyt naǵyz dostyqtyń shyńdalǵan kezeńi bolǵandyǵyn Nursultan Ábishuly únemi ystyq sezimmen aıtyp keledi.
Nursultan Nazarbaevtyń úlken ómirdiń qaınaǵan ortasyna kelip, kezdesken qanshama qıyndyqtarǵa moıymaı qaısarlyqpen qarsy turyp, jeńe bilgendiginiń ózi onyń qanynda bar qaıtpas qaısarlyǵyn, ór minezdiligin, tektiligin tanytsa kerek. Atalǵan fılmde osy jaılar óte sátti kórinis tapqan. Sonymen birge, týǵan halqyna, Otan-anaǵa degen sheksiz súıispenshiliginiń, qajyrlylyǵynyń arqasynda tamasha jetistikterge jetken kezeńderi de óte sátti kórsetilgen. Máselen, qıyndyqqa shydamaı aýylǵa qaıtqysy kelgen jastar namysyn qaırap, úgittep, osy qurylystyń ıesi erteńgi kúni ózderi ekendigin túsindiretin shaqtary da óte áserli. Bul búgingi urpaqqa aıtarlyqtaı ónege, mol taǵylym.
Sol kezdegi qaıratty jastardyń arasynda óziniń komsomoldyq jalyndy jigerimen, ulttyq rýhanı baı tárbıesiniń arqasynda basqa ult ókilderiniń ortasynda úırenýge, bilýge qushtarlyǵymen, eńbektiń asaý ótkelderinde jasymaı, ómir baspaldaqtarynyń bıik satysyna órlep kele jatqan, jigerli jastyq shaǵy ádemi kórsetilgen. Shyndyǵynda da, sol kezdegi jastardyń erlikke toly «quryshtaı berik» kezeńin árdaıym maqtanyshpen moıyndaýǵa týra keledi.
Fılm elimizdiń erteńi – jas urpaq kókeıine sáýle quıar ónegelik mańyzdylyǵymen qundy. Halqymyz baqytyna jaratylǵan, senimin aqtaýda sińirýdegi eńbegi erekshe Elbasynyń ósý, shyńdalý jolyndaǵy ómir belesteri taǵy bir qanyqqanymyzdaı barsha jurtymyzǵa zor maqtanysh.
Rymbala OMARBEKOVA,
Qazaqstan Respýblıkasynyń
eńbek sińirgen qyzmetkeri.
QARAǴANDY.
