Keshe, 20 jeltoqsan kúni Aqtaýda 2013 jyldyń qorytyndysy boıynsha «Jyl adamdaryn» marapattaý rásimi boldy. Ataq 15 atalym boıynsha taǵaıyndaldy. Bul týraly Lada.kz habarlady.
Jyldyń úzdik adamdaryn marapattaýǵa arnalǵan saltanatta Mańǵystaý oblysynyń ákimi Alık Aıdarbaev nomınanttardy osy jetistikterimen quttyqtap, olarǵa jańa jylda jańa tabystar tiledi.
«2013 jyl aıaqtalyp keledi. О́tip bara jatqan jyldyń qorytyndysyn shyǵara otyryp, biz dástúrli «Jyl adamy» syılyǵynyń laýreattaryn da anyqtadyq. «Jyl adamy» - óz isine berilgendik pen Otanǵa degen súıispenshiligin kórsetý arqyly jurtqa úlgi-ónege bolyp kele jatqan túrli mamandyqtyń ıeleri, - dedi aımaq basshysy.
Atalym ıegerlerine marapattaryn tapsyrý rásimi áıgili «Oskar» syılyǵyn tabys etý tásilimen júrgizildi. Árbir atalym boıynsha birneshe úmitkerdiń ishinen bir úzdik atalyp otyrdy. Oǵan «Jyl adamynyń» sımvoly retinde Altyn adam keıpindegi músin tapsyryldy. Al júldelerdi aımaqtaǵy densaýlyq saqtaý, óner, qurylys sekildi kóptegen salalar boıynsha eńbek sińirgen maıtalman mamandar usynyp turdy.
«Jyl ǵalymy» ataǵy Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetiniń kafedra dosenti, tarıh ǵylymdarynyń kandıdaty Elvıra Ablanovaǵa berildi. «Jyl tárbıeshisi» júldesine talasta Aqtaýdaǵy №4 oblystyq arnaıy korreksııalyq mektep-balabaqshanyń tárbıeshisi Galına Koroleva ozyp shyqty. «Jyl muǵalimi» atalymy Túpqaraǵan aýdanydaǵy №1 mektep-lıseıdiń dırektory Saıyn Shapaǵatovaǵa buıyrdy. «Jyl dárigeri» ataǵyna oblystyq aýrýhana kardıohırýrgııa bóliminiń meńgerýshisi Jeńis Bolatuly laıyqty dep tanylsa, «Jyl aıajany» bolyp balalar aýrýhanasy jańa týǵandar patologııasy bóliminiń qyzmetkeri Valentına Býzar ataldy. «Jyl sportshysy» marapatyna boksshy Berik Ábdirahmanov qol jetkizdi.
Budan ári «Jyl fermeri» ataǵyn «KaspııAgroKompanı» JShS dırektory Talant Naýryzbaev, «Jyl qurylysshysy» ataǵyn «Evrostroı-A» JShS dırektorynyń qurylys jónindegi orynbasary Valerıı Pastýhov, «Jyl munaıshysy» ataǵyn «JetibaıMunaıGaz» operatory Qaırat Dúısenbaev aldy.
Al Jańaózen qalasy ishki ister basqarmasynyń ınspektory Maqsat Moldabaı «Jyl polıseıi» atandy.
Murat Aıtqoja.
Derekkóz: Lada.kz.
