Jeńil atletıkadan halyqaralyq dárejedegi KSRO sport sheberi, QazKSR eńbek sińirgen jattyqtyrýshysy, Qazaqstanǵa eńbek sińirgen mádenıet qaıratkeri Saılaý Altynbaıuly Turyskeldın jasy 76-ǵa qaraǵan shaǵynda ómirden ótti.
Saılaý Turyskeldın 1937 jylǵy 12 jeltoqsanda Almaty oblysy Qaratal aýdanynda týǵan. 1963 jyly Almaty dene tárbıesi ınstıtýtyn bitirgen. Ár jyldary Almaty zooveterınarlyq ınstıtýtynyń oqytýshysy, Almaty qalalyq bilim bólimi balalar men jasóspirimder mektebiniń dırektory, dene tárbıesi jáne sport komıtetiniń aǵa jattyqtyrýshysy, Bilim mınıstrliginiń bólim bastyǵy, Qazaq kásiptik odaǵynyń bólim meńgerýshisi, «Qaırat» erikti sport qoǵamy ortalyq komıtetiniń tóraǵasy bolyp qyzmet atqardy. 2001-2008 jyldary Almaty tehnologııalyq ýnıversıtetiniń dene tárbıesi kafedrasyn basqardy.
S.Turyskeldın Almatyda XIII Búkilodaqtyq oqýshylar spartakıadasyn ótkizý jónindegi uıymdastyrý jumystaryna belsene qatysty. Olımpıada oıyndarynyń chempıondary men júldegerlerin daıyndaýǵa aıtarlyqtaı úles qosty. Sonymen qatar oblystar men aýdandarda aýyl sportshylary oıyndaryn ótkizýdiń bastamashylarynyń biri boldy.
Sportty bala jasynan serik etken Saılaý Altynbaıuly odan ómir boıy qol úzgen joq. Ol ardagerler arasynda ótken kóptegen halyqaralyq jarystarǵa udaıy qatysyp otyrdy. Jasy alpystan asqannan keıin Azııanyń ardagerler arasyndaǵy chempıonatynda eki dúrkin top jardy, bir ret qola júldeger atandy. Ol Otan aldynda sińirgen eńbekteri úshin «KSRO aǵartý isiniń úzdigi», «QazKSR halyq aǵartý isiniń úzdigi», «Dene tárbıesi jáne sport isiniń úzdigi» ataqtaryn aldy.
Qazaqstan Respýblıkasy Sport jáne dene shynyqtyrý isteri agenttigi Saılaý Altynbaıulynyń qaıtys bolýyna baılanysty qaıǵyryp, týǵan-týysqandary men dostaryna kóńil aıtady.
Qazaqstan Respýblıkasy Sport jáne dene shynyqtyrý isteri agenttigi.
