Qujatqa TMD memleketteriniń basshylary 2019 jylǵy 11 qazanda Ashǵabad qalasynda qol qoıdy. Konvensııanyń negizgi maqsaty – ár azamatqa óz jazasyn turǵylyqty jeri boıynsha óteýge múmkindik berý.
«Konvensııaǵa sáıkes sottalýshy nemese onyń zańdy ókili óz jazasyn turǵylyqty jerinde óteý týraly ótinish beredi. О́tinish boıynsha sol eldiń bas prokýratýrasy suraý salady», dedi Ishki ister mınıstri Erlan Turǵymbaev.
Suraý salýǵa myna qujattar qosa beriledi: sottalýshynyń azamattyǵy, sot sheshiminiń kóshirmesi, minezdeme, keltirilgen shyǵyn týraly málimetter.
«Jazasyn óteýshini qabyldaıtyn memleket belgilengen jazadan qatań emes jaza taǵaıyndaıdy. Jazasyn óteýshi sheshim qabyldaǵan soń, 45 kúnde óz betinshe elden shyǵýy tıis. Al eger bul talap oryndalmasa, zań boıynsha májbúrli túrde elden shyǵarylady. Suraý salýdan bas tartý negizderi de qarastyrylǵan. Ulttyq zańnamaǵa sáıkes jazasyn óteýshiniń áreketi qylmys bolyp sanalmasa, qylmystyń merzimi ótip ketse, el táýelsizdigi men ulttyq qaýipsizdigine qaýip bolsa, ulttyq zańnamaǵa qaıshy ózge de jaǵdaıda bas tartylady», dedi mınıstr.
Mınıstrdiń aıtýynsha, qazirgi ýaqytta elimizde 447 shetel azamaty probasııada tur. Olardyń arasynda О́zbekstannan 216, Reseıden – 138, Qyrǵyzstannan – 38, Armenııadan 5 azamat bar. Al ózge elderde 280 Qazaqstan azamaty jazaǵa tartylǵan. Sonyń ishinde Reseıde 251, О́zbekstanda – 24, Qyrǵyzstanda – 2, Belarýsta úsh azamat bar.
