ShQO QAJ departamenti baspasóz qyzmetiniń málimetine súıensek, er adam 2020 jyldyń jazynda Almaty qalasynda júrgende ońaı aqsha tabýǵa bel býǵan.
Instagram jelisine tirkelgen ol ózin estrada ánshileriniń menedjeri retinde tanystyrady. Sodan keıin jeli paıdalanýshylaryn avtokólik pen 500 myń teńge aqsha tigilgen utys oıynyna qatysýǵa shaqyrǵan.
Paraqshasyna jazylǵandar arasynan jeńimpazdardy, dálirek aıtqanda jábirlenýshilerdi iriktep alyp, olarǵa kelesi mazmundaǵy habarlama jibergen: «Sálemetsiz be! Siz bizdiń utys oıynymyzdyń jeńimpazy atandyńyz! Sáttilik serik bop, baǵyńyz jandy! Endi osy ánshiniń avtorlyq albomyn satyp alýyńyz kerek, sodan keıin óz utysyńyzdy ala alasyz». Budan soń «jeńimpaz» belgili bir somany alaıaqtyń «Kaspi Gold» kartasyna aýdaryp, óziniń utysyn kútken. Alaıda aqshaǵa qol jetkizgen jalǵan menedjer sol adamdy buǵattap, óz akkaýntyn óshirip tastaǵan», delingen habarlamada.
Kóp uzamaı alaıaq ustalyp, onyń isi sotqa jetti. Sot úkimimen aıyptalýshy úsh jylǵa bas bostandyǵynan shekteldi.
«Bul istegenime qatty ókinemin. Birinshi ret sottalyp otyrmyn. Endi zańdy buzbaspyn. Qylmys jasaǵan kezde onyń sońy osyndaı bolady dep esh oılamadym. Qazirgi ýaqytta jábirlenýshilerge keltirilgen materıaldyq shyǵyndy ótep jatyrmyn», dedi er adam.
