Qarjy • 12 Aqpan, 2021

«AsiaCredit Bank» AQ-nyń lısenzııasynan aıyrylýy bank sektoryna qalaı áser etedi?

30 ret kórsetildi

12 aqpan kúni qarjy naryǵyn retteý jáne damytý agenttigi «AsiaCredit Bank» AQ-ny lısenzııasynan aıyrý týraly sheshimin jarııa etti. Bank prýdensııalyq normatıvterdi jáne lımıtterdi júıeli túrde buzǵan. Agenttiktiń birneshe márte eskertýi jáne talap etýine qaramastan bank klıentter aldyndaǵy mindettemesin oryndamaǵan.

Lısenzııadan aıyrǵan kúngi jaǵdaı boıynsha bank aktıvteriniń mólsheri 45,4 mlrd teńge, qaryz portfeli 45,0 mlrd teńge bolsa, 90 kúnnen astam ýaqyt boıy tólenbegen nesıe kólemi 31,6 mlrd teńgege jetken. Iаǵnı, bul nesıe portfeliniń 70 paıyzy. 

Telegramdaǵy Risk Takers kanaly bank qyzmetiniń toqtaýyna sebep bolǵan basty sebepti ataıdy.   

– «AzııaKredıtBanktiń» bankrottyqqa bara jatqany 2018 jyldyń qazanynda-aq túsinikti bolǵan. 2019 jyldyń tamyz aıynda bul bank «qoqys» aktıvterdi jınap, qarjylyq qadaǵalaýshynyń eskertýin aldy. Táýekel-menedjmentiniń álsiz júıesi jáne bank modeli 2014-2018 jyldar aralyǵynda qaryz portfeliniń agressıvti ósimine ákelip, birneshe jyldan soń onyń (banktiń) tolyqtaı joıylýyna áser etti, – deıdi kanal avtory Tımýr Ábilqasymov. 

Sarapshynyń aıtýynsha, Ulttyq bank ekinshi deńgeıli bankterdiń ne istep, ne qoıyp jatqanyn qadaǵalap, baqylap otyrýy kerek edi. Alaıda ol óz mindetin oryndaı almady. Nátıjesinde bank qaıtarylmaǵan nesıeler berýmen aınalysyp, bul onyń jabylýyna ákelip soqty dedi. Avtordyń sózinshe, osyǵan deıin «AzııaKredıtBankti» memlekettik uıymdardyń qarjysy, onyń ishinde BJZQ-nyń da qarjysy bolǵany úshin lısenzııasynan aıyra almaı kelgen. 

– Bank aksıonerinde jáne qadaǵalaýshyda kvazımemlekettik kompanııalar aldyndaǵy qaryzyn óteý boıynsha kelisim bar bolýy múmkin. Al depozıtterdi kepildendirý qory azamattar aldyndaǵy mindettemelerdi jabýǵa májbúr bolady. Bizdiń aqparatymyz boıynsha, «AzııaKredıtBank» birtindep kelisimdi oryndap, birqatar memlekettik uıymdarǵa qarjysyn qaıtarady. Aksıonerlerdiń bul nıetin rastaıtyn birden bir jaǵdaı – BJZQ aldyndaǵy mindetterdi ishinara óteýi. Bizdiń boljamymyz rastaldy. Qarjy naryǵyn retteý jáne damytý agenttiniń aqparatynsha, bank BJZQ aldyndaǵy qaryzdy ótegen. Al uzaq ýaqyt boıy óz aqshasyn ala almaı kelgen jeke tulǵalar qarjysyn depozıtterdi kepildendirý qorynan alady. Endi tek taǵdyry sheshilmegen Capital Bank qaldy. Alaıda ondaǵy jaǵdaı áldeqaıda ońaı. Ol jerde jeke tulǵalardyń qarjysy joq. Tek aksıoner qaıtaryp berýi tıis kvazımemlekettik kompanııalar qarjysy qalǵan. Solardyń aldyndaǵy qaryzyn qaıtarǵan soń, Capital Bank te lısenzııasynan aıyrylady, – dep jazady kanal avtory. 

Sarapshylardyń aıtýynsha, banktiń joıylýy bank sektory turaqtylyǵyna keri áserin tıgizbeıdi. «AzııaKredıtBanktiń» úlesi de kóp emes – 91,6 mlrd dollar nemese 0,29 paıyz eken.

«Lısenzııadan aıyrylýy qarjy sektoryna áser etpeıdi dep aıtýǵa kelmes. Alaıda defolttyń bolýy birneshe jyl buryn baıqalǵandyqtan, reıtıng agenttikteri muny óz esebine kirgizip úlgerdi» deıdi ekspert.   

S&P Global Ratings baǵalaýy boıynsha bankterdiń jıi defoltqa ushyraýy jáne olardyń lısenzııasynan aıyrylýy qazaqstandyq bank sektoryn 10 táýekel deńgeıiniń (eń joǵary táýekel deńgeıi) 9-sanatyna aýystyrdy. Áldeqaıda tómen táýekel kategorııasyna oralý úshin bizge 5 jyl boıy bank defoltyna jol bermeı jáne olardyń kapıtalızasııasyn arttyrý qajet eken. 

Tengenomika kanaly da bul banktiń lısenzııadan aıyrylýyn tańdanarlyq jaǵdaı emes dep baǵalaıdy. 

– 2020 jyly bank 71 ereje buzýshylyq jasaǵan. Bul 2018 jáne 2019 jyldarmen salystyrǵanda 1,5 ese kóp. 2018 jyly Standard & Poor's reıtıng agenttigi banktiń uzaq merzimdi jáne qysqa merzimdi nesıe reıtıngin «B- / B»-dan «CCC+ / C»-ǵa túsirip tastaǵan. 2019 jyldyń qorytyndysy boıynsha bank 5,2 mlrd teńge shyǵynǵa batty jáne teris qarjy aǵyny 9 mlrd teńgeni qurady. 2020 jyldyń ekinshi jartysynda BAQ-ta bank klıentteri depozıtten óz qarjylaryn sheshe almaı jatqany týraly aqparat tarady, – dep jazady kanal. 

Bank depozıtinde qarjysy bar jeke tulǵalar óz aqshasyn Qazaqstannyń depozıtke kepildik berý qorynan ala alady. Qor osyǵan deıin taratylǵan «Astana Bank», «Qazaq Banki», «Valıýt-Tranzıt Bank» salymshylarynyń depozıttegi qarjysyn tólep berdi. Kúni búginge deıin oryndalǵan mindettemeler kólemi 77 mlrd teńgege jetken. 

«Qor ótem tóleýdi bastaý kúnin zańnamada bekitilgen merzimde habarlaıdy. Tólemderdi júzege asyrý sharasy resmı habarlama Qor saıtynda jáne buqaralyq aqparat quraldarynda jarııalanǵan kúnnen bastap, 5 jumys kúni ishinde bastalady» delingen habarlamada.

Qazir bankte 23 174 jeke tulǵanyń depozıti bar. Onda 19 mlrd teńge jınalǵan. 2019 jyldyń shilde aıynan beri bank bıznesmen Orıfdjon Shodıevtiń ıeliginde bolǵan. Oǵan Capital Bank-te tıesili. Eki qarjy ınstıtýty birneshe ret birigetinin jarııalady, biraq bastama sol kúıi júzege asqan joq.

Sońǵy jańalyqtar

Indet qaıta órshidi

Álem • Keshe

О́ńirde damý úrdisi bar

Aımaqtar • Keshe

Tańdaıdyń tarlany

Tarıh • Keshe

Joǵalǵan soldat

Tarıh • Keshe

Dombyrany dáriptedi

Rýhanııat • Keshe

Almatyda 36 gradýs ystyq bolady

Aýa raıy • Keshe

Búgin - Ulttyq dombyra kúni

Qazaqstan • Keshe

Uqsas jańalyqtar