Kórmeni ashqan Elbasy kitaphanasynyń dırektory Baqytjan Temirbolat qylqalam sheberiniń aıshyqty qoltańbasy týrasynda aıta kelip, qazaq beıneleý óneri tarıhyndaǵy ornyn erekshe atap ótti. Mádenıet jáne sport mınıstri Aqtoty Raıymqulovanyń quttyqtaý hatyn oqyp bergen vıse-mınıstr Nurqısa Dáýeshov sýretshiniń el mádenıetine, sonyń ishinde kórkemsýret ónerine qaltqysyz qyzmet etkeni úshin alǵysyn bildirdi.
Kórmege Aýstrııa, Belarýs, Nıderland, Germanııa, Reseı, Japonııa, Úndistan, Chehııa, Qyrǵyzstan, Kýveıt, Soltústik Makedonııa, Tatarstan elshileri men basqa da dıplomatııalyq korpýstyń ókilderi, galereıalar, mýzeıler men mádenı ortalyqtardyń basshylary, kórnekti sýretshiler, ónertanýshylar jáne óner qaıratkerleri qatysty.
«Kamıl Mýllashev – erekshe kózqarasy bar adam, naǵyz keskindeme sheberi. Ol sýretti óte názik salady, sonymen birge anyq ári shynaıy. Barlyq shyǵarmalarynda onyń jan-dúnıesi sezilip turady. Meniń oıymsha, bul sheberdiń kartınalaryn kórgenderdiń bári avtor shyǵarmashylyǵynan lázzat alyp, talantyna tánti bolady», dep atap ótti Nıderland Koroldiginiń Qazaqstan Respýblıkasyndaǵy Tótenshe jáne О́kiletti elshisi Andre Karstens.
Kesh sońy avtograf-sessııamen jalǵasyp, avtor búgingi jastarǵa janr, stıl turǵysynan ulttyq ónerdiń endigi betalysy jaıynda áńgimelep berdi. K.Mýllashevtiń katalogy Qazaqstan Respýblıkasy Mádenıet jáne sport mınıstrligi men «Astana» halyqaralyq ýnıversıtetiniń qoldaýymen basylymǵa shyqqan. Kórme aqpan aıynyń sońyna deıin jalǵasady.
