Ortalyqtyń trenajer zaly, áleýmettik-turmystyq bólmesi, kompıýter synyby bar.
– Eń bastysy, munda emdeý-dene shynyqtyrý kesheni bar. Munda kishkentaı balǵyndar kásibı ınstrýktordyń kómegimen bir arbadan ekinshi arbaǵa aýysýdy, eńbekteýdi úırenedi, sondaı-aq arbany jáne óz denesin basqarý daǵdysyna mashyqtanady. Jattyǵýlar jumsaq kilemniń ústinde ótedi, – dedi ortalyqtyń áleýmettik máseleler jónindegi mamany Marat Aıtbaev.
Ońaltý ortalyǵynyń arnaıy sport zaly da bar. Munda Qostanaı oblysynyń paralımpıadalyq sport túrleri federasııasy múmkindigi shekteýli balalar men jasóspirimderge arnap 6 ústel tennısin, paýerlıftıngpen aınalysýǵa arnalǵan sport quraldary men eki sáki, júrý daǵdysyn qalyptastyratyn jattyǵý qurylǵysyn ákep ornatqan. Sport zaldyń bir buryshynda 8 kásibı bı arbasy tur. Ortalyq mamandarynyń aıtýynsha, sport zal 25 balaǵa arnalǵan. Munyń syrtynda, erekshe muqtajdyqqa ıe balalardy tárbıelep otyrǵan 25 anaǵa qyzmet kórsete alady.
– Sáýir aıynyń sońyna taman «Qolymnan bári keledi» dep atalatyn týrnır ótkizýdi josparlap otyrmyz. Ortalyqqa kelip júrgen balalardyń bul jerden ne úırengeni sol jarysta belgili bolady. Al mamyr aıynda analar men balalardy «Hatıko» demalys ornyna aparamyz. Tabıǵat aıasyna shyqqan balalardyń belsendiligi artyp, moraldyq jaı-kúıi jaqsarady. Ári qaraı oblys kólemindegi erekshe balalardy iriktep alyp, sport seksııalary men úıirmelerge tartýdy kózdep otyrmyz. Beıimdeý ortalyǵy, eń aldymen, ár balaǵa ózine unaıtyn, qolynan keletin sport túrin tańdap, súıikti isimen aınalysýyna múmkindik beredi, – dedi «Úmit-Nadejda» qoǵamdyq qorynyń dırektory Dúısenǵalı Ospanov.
Erekshe balalarǵa esigin aıqara ashqan ońaltý ortalyǵyna alǵash kelgen ata-ananyń biri – qostanaılyq Valentına Nestereva. Uly 13 jasta, týabitti serebaldy sal aýrýymen, ıaǵnı BSP-men aýyrady.
– Densaýlyǵy sál de bolsa jaqsaryp qalar degen úmitpen balamdy talaı jerge arqalap apardym. Osy qaladaǵy sport seksııalary men úıirmelerdiń bárine aparyp shyqtym. Endi, mine, beıimdeý ortalyǵyndaǵy arnaıy keshende balama kerektiń bári bar. Eń bastysy, ulymdy erekshe balalarmen qalaı jumys isteý kerek ekenin jaqsy biletin kásibı mamandar jattyqtyrady. Sondaı-aq, balama qajet qyzmet túrleri men ońaltý sharalaryn da bir jerden alamyz, – dedi V.Nesterova.
Ońaltý ortalyǵynda san salany meńgergen bilikti mamandar jumys isteıdi. Ǵımaratta balalarǵa arnalǵan birneshe oıyn bólmesi bar. Mysaly, bir bólmedegi maman balalardyń oılaý qabiletin damytýmen aınalyssa, ekinshi bólmede qımyl-qozǵalysqa daǵdylandyrý oıyndary ótedi.
Qostanaı oblysy
