«Nur Otan» partııasynyń kezekten tys HV sezi jumysyna Qyzyljar óńirinen qatysqan delegattar jańa Saıası doktrınanyń mán-maqsaty men mańyzyn túsindirý sharalaryna qyzý kirisip ketken. Biz belsendi uıymdastyrýshylardyń biri, Petropavl qalalyq máslıhatynyń depýtaty Saıran HAMZINGE jolyǵyp, forýmnan alǵan áserleri men tarıhı qujat tóńireginde pikir alysqan edik.
«Nur Otan» partııasynyń kezekten tys HV sezi jumysyna Qyzyljar óńirinen qatysqan delegattar jańa Saıası doktrınanyń mán-maqsaty men mańyzyn túsindirý sharalaryna qyzý kirisip ketken. Biz belsendi uıymdastyrýshylardyń biri, Petropavl qalalyq máslıhatynyń depýtaty Saıran HAMZINGE jolyǵyp, forýmnan alǵan áserleri men tarıhı qujat tóńireginde pikir alysqan edik.
– Saıran Shaısultanuly, siz «Nur Otan» partııasynyń HIII, HIV sezderine delegat bolyp qatystyńyz. Sońǵy sezd nesimen erekshelengen edi?
– Bıyl «Nur Otan» partııasynyń qurylǵanyna 15 jyl toldy. Osy ýaqyt aralyǵynda jurtshylyqtyń úlken senimine ıe bolǵan qýatty saıası kúsh retinde nyǵaıyp, elimizdiń áleýmettik-ekonomıkalyq damýyna zor úles qosyp keledi. Partııanyń negizin qalaýshy Elbasy Nursultan Nazarbaevtyń bastaýymen memlekettiligimiz nyǵaıyp, órkenıetti elder qataryna qosylýǵa umtylyp otyrmyz. Eń bastysy, bir shańyraq astynda ultaralyq, konfessııaaralyq birlik pen kelisimniń qalyptasýyn Táýelsizdigimizdiń basty jemisteriniń birine balaǵan ábden qısyndy. Partııanyń qaı sezin alsaq ta, saıası tuǵyrnamalardyń oryndalýymen, tarıhı mańyzdy sheshimderdiń qabyldanýymen, aldaǵy strategııalyq baǵyttardyń anyqtalýymen daralansa, sońǵy sezd de ózindik ózgeshelikter men erekshelikterge toly bolǵanyn basa aıtqym keledi. «Dóńgelek ústel» sıpatynda ótýiniń ózinen-aq erkin oılar toǵysy men pikirler áralýandyǵyna keń múmkindikter týdyrylǵanyn ańǵarýǵa bolady.
Desek te, talqylanǵan máselelerdiń ishinde partııa Tóraǵasynyń tapsyrmasyna sáıkes eki aı boıy búkilhalyqtyq talqylaýǵa ulasyp, delegattardyń qoldaýymen ábden saralanǵan jańa Saıası doktrınanyń qabyldanýy basty jańalyq desek, esh talas týdyra qoımas. Elbasy sóılegen sózinde sezdiń túıindi mindeti retinde HHI ǵasyrdyń orta shenindegi bizdiń barsha uly maqsattarymyzǵa qol jetkizýdegi «Nur Otan» partııasynyń alar orny men saıası mańyzyn aıqyndap, irgeli mindetter qoıdy. Doktrına partııanyń bolashaqqa jol silteıtin temirqazyǵy bolý tıistiligin qadap aıtty. О́ıtkeni, bárimizdiń aldymyzda elimizdi álemniń eń qýatty 30 memleketi sapyna qosý sekildi asqaraly asý tur. Bul oraıda, Qazaqstannyń jańa tarıhı betburys belesin naqtylap bergen «2050» Strategııasy partııalyq baǵdarlamalarymyzdyń negizi desek, meniń oıymsha, bir-birin tolyqtyratyn bul eki tarıhı qujatsyz elimizdiń odan ári damýyn, jarqyn bolashaǵyn kózge elestetýdiń ózi qıyn.
– «Nur Otan». Nurly bolashaq jolynda» atty jańa Saıası doktrına jónindegi paıymdaryńyzben bólisseńiz?
– Jańa Saıası doktrınanyń tarıhı mán-mańyzyna Prezıdent sezde sóılegen sózinde naqty sıpattama berdi. Partııa Doktrınasy «Nur Otannyń» HHI ǵasyrdaǵy mıssııasyn jáne «Qazaqstan-2050» Strategııasyn tıimdi júzege asyrýdy qamtamasyz etýdegi bizdiń alar ornymyzdy naqty aıqyndady. Ol demokratııalyq, órkendegen, básekege qabiletti jáne áleýmettik baǵdarly memleket qurý bolyp tabylady. Doktrınada atap kórsetilgendeı, basty jetistigimiz de, bar baqytymyzdyń bastaýy da Táýelsizdik desek, memlekettiń, qoǵamnyń jáne azamattardyń kúsh-jigerin eldigimizdi, memlekettiligimizdi nyǵaıtýǵa baǵyttaýdan asqan mártebe joq. Jalpyǵa ortaq tabystyń faktorlary áldeqashan aıqyndalǵan: olar – birlik pen kelisim, tól mádenıet pen rýhanılyq, qýatty ekonomıka men ádiletti áleýmettik saıasat, zııatkerlik ult pen tıimdi memlekettik basqarý. Mine, osy basym qaǵıdattarǵa aıryqsha mán bere otyryp, partııanyń barlyq sheshimderi men is-qımyldaryn Qazaqstandy órkendetý ıdeıasymen oraılastyrýdyń mańyzy zor.
– Jyl ótken saıyn «Nur Otan» partııasynyń oblystyq fılıaly uıymdyq-qurylymdyq jaǵynan nyǵaıyp, búginde 45 myńǵa jýyq adamdy biriktirip otyr. Aralarynda túrli mamandyq ıeleri kóp. Olardyń bir parasy – kásipkerler. Siz qoǵamdyq jumystarmen aınalysýǵa da ýaqyt taýyp júrsiz. Aldymen jemqorlyqpen kúres jónindegi qoǵamdyq keńestiń jetekshisi retinde ne atqaryp, ne tyndyrdyńyz?
– Sezde Elbasy qoǵamdy jegi qurttaı jegen qaýipti kesel – sybaılas jemqorlyqqa qarsy aıaýsyz kúres júrgizip kele jatqan qoǵamdyq qurylymdardyń qyzmetin aıryqsha baǵalap, saıası kóshbasshylyqtyń qaǵıdatty máselesi, ıaǵnı jemqorlyqqa qarsy bitispes strategııany naqtylap berdi. Biz de jumysymyzdy osy turǵydan uıymdastyryp, azamattyq ar-ojdannyń qaǵıdatty saqshysy qyzmetin jalǵastyryp kelemiz. «О́zińnen basta!», «Taza sessııa», «Jemqorlyqqa jol joq!» aksııalary qataryna jastar, stýdentter, úkimettik emes uıymdar kóptep tartyldy. Quqyq qorǵaý organdarymen birlesip, reıdter júrgizildi. Qoǵamdyq keńes otyrystarynda jemqorlyqtyń aldyn alý jaılary júıeli qozǵalyp otyrady.
Aqyry saýal qoıǵan ekensiz, basqa da qoǵamdyq jumystar jóninde baıandaı keteıin. Men, bir jaǵynan, Petropavl qalalyq partııalyq tekserý komıssııasyna jetekshilik etemin. Sóz arasynda «Turǵyn úı-kommýnaldyq sharýashylyqty jańǵyrtý», «Qoljetimdi baspana-2020» baǵdarlamalaryn oryndaý barysynda oryn alǵan olqylyqtarǵa oraı naqty sharalar qoldanylǵanyn aıta ketken jón. Máselen, «Bereke» shaǵyn aýdanynda salynyp jatqan turǵyn úılerdiń sapasyzdyǵy, merdiger uıymdardyń óz isterine salǵyrttyǵy atap kórsetildi. Kemshilikter dereý joıyldy. Depýtattar basqarýyndaǵy 7 baqylaý beketteri de kemshilikterdi qalt jibermeıdi.
– Biz sizdi isker azamat, tanymal kásipker, turmysy tómen otbasylarǵa, ata-ananyń qamqorlyǵynsyz qalǵan balalarǵa júıeli qaıyrymdylyq jasaıtyn jomart jan retinde de jaqsy bilemiz. Endigi áńgimeni osy baǵytta órbitsek.
– Elbasy partııalyq kóshbasshylyqtyń basty máseleleriniń biri retinde ekonomıkalyq jáne áleýmettik ınnovasııalardyń jalpyulttyq epısentri bolý jaıyna basa nazar aýdaryp, qoǵam men memleketti damýdyń batyl, ınnovasııalyq ıdeıalarmen árlendirý tıistiligin alǵa tartty. Búginde álem ekonomıkalyq, ınnovasııalyq kásiporyndarmen qosa, ozyq oılarmen, ǵylymı jańalyqtar negizinde de jumys isteıdi. Olaı bolsa, biz sekildi bıznes salasynyń ókilderi de ýaqyt kóshine ilesip, Qazaqstandy órkendetýge óz úlesterin qosýlary kerek.
Búginde Petropavl qalasynda 150-ge jýyq páterdi qonaqúı qyzmetine tarttyq. Bastapqyda Eýropa Qaıta qurý jáne damý bankinen qarjy alyp, qalǵanyn ózimiz salyp, bıznestiń alǵashqy álippesin bastaǵanbyz. Keıin, qonaqúı qyzmet júıesi keńeıgen soń, naryqqa «Park haus» degen atpen shyqtyq. Ondaǵy maqsatymyz tutynýshylarǵa sapaly ári qoljetimdi qyzmet kórsetý bolyp tabylady. Odan soń germanııalyq áriptesterdiń kómegimen franchaızıng júıesin engizýdi qolǵa aldyq. Bıznespen aınalysýǵa tilek bildirýshilerge ozyq tehnologııamyz ben jobamyzdy usynyp, qyr-syryn úıretýge ázirmiz.
Endi oblys ortalyǵynan 3 qabatty meıramhana ashý maqsatymen ǵımarat satyp aldyq. Ol fransýzdyq úlgide qurylady. Onyń bir qabaty 30 ben 50 jas aralyǵyndaǵy adamdarǵa arnalyp, bı klýby retinde jasaqtalady. «Dostavka.kz degen ınternet jobasyn jasap, tamaq mázirlerin úıge jetkizip berý jaǵyn oılastyrýdamyz. Onyń qanshalyqty tabys ákeletinin ýaqyt kórsetedi. Qazir 80 adam jumysqa tartylsa, atalǵan jobalar júzege asqan jaǵdaıda jumysshy-qyzmetkerlerdiń sany 150-ge deıin jetetin bolady.
«Bıznestiń jol kartasy-2020» baǵdarlamasy sheńberinde jeńildetilgen nesıe alyp, qonaqúı júıesin odan ári keńeıttik. «Oblystyq meıramhanalar men qonaqúıler» assosıasııasynyń tóraǵasy retinde tamaqtandyrý salasynyń kásibı sheberlerin daıyndaý, sheber-synyptar ashý, túrli baıqaýlarǵa qatysý dástúrinen syrt qalǵan emespiz. Osy oraıda, norvegtikterdiń tájirıbesi negizinde stýdenttiń teorııalyq bilimimen qosa, eki jyl óndiriste shyńdaý sııaqty ozyq tásilin qoldanýǵa nıet etip otyrmyz.
Qaıyrymdylyq sharalaryna keletin bolsaq, arnaıy ashqan esepshot arqyly muqtajdarǵa qarjylyq demeý jasaımyz. Balalar úıi erekshe qamqorlyǵymyzda. Kómek suraı kelgen adamdardy bosqa qaıtarmaýǵa tyrysamyz.
Qysqasy, sezd boıymyzdaǵy qulshynysymyzdy oıatyp, jańasha eńbektenýge jigerlendirgenin, tyń jobalarǵa qozǵaý salǵanyn aıtqym keledi. Ortaq ıgilikke qol jetkizý jaýaptylyǵy eń aldymen «Nur Otan» partııasyna senip tapsyryldy. Olaı bolsa, halyq múddesine qyzmet etýden birde-bir nurotandyq shet qalmaýy tıis.
Áńgimelesken
О́mir ESQALI,
«Egemen Qazaqstan».
Soltústik Qazaqstan oblysy.
