Onyń saldaryn joıǵannan aldyn alǵan tıimdi
Birer kúnnen keıin tórin jylqy jylyna usynatyn 2013 jyl elimizdiń qutqarýshylary men órt sóndirýshilerine ońaı jyl bolǵan joq. Jyl boıy túrli tabıǵı jáne tehnıkalyq tótenshe oqıǵalardan kóz ashpaǵan Tótenshe jaǵdaılar mınıstrliginiń qyzmetkerlerine táýligine 150-den 240-qa deıingi shaqyrymǵa shyǵýǵa týra kelgen. Bul jaıynda keshe Prezıdent janyndaǵy Ortalyq kommýnıkasııalar qyzmetinde jýrnalıstermen kezdesken Qazaqstan Respýblıkasy Tótenshe jaǵdaılar mınıstri Vladımır Bojko habarlady.
* Saqtansań – saqtaıdy
Onyń saldaryn joıǵannan aldyn alǵan tıimdi
Birer kúnnen keıin tórin jylqy jylyna usynatyn 2013 jyl elimizdiń qutqarýshylary men órt sóndirýshilerine ońaı jyl bolǵan joq. Jyl boıy túrli tabıǵı jáne tehnıkalyq tótenshe oqıǵalardan kóz ashpaǵan Tótenshe jaǵdaılar mınıstrliginiń qyzmetkerlerine táýligine 150-den 240-qa deıingi shaqyrymǵa shyǵýǵa týra kelgen. Bul jaıynda keshe Prezıdent janyndaǵy Ortalyq kommýnıkasııalar qyzmetinde jýrnalıstermen kezdesken Qazaqstan Respýblıkasy Tótenshe jaǵdaılar mınıstri Vladımır Bojko habarlady.
Almaty, Shyǵys Qazaqstan men Pavlodar oblystarynyń taýly aımaqtaryndaǵy qar kóshkini salǵan álek pen Ońtústik Qazaqstan, Qaraǵandy, Batys Qazaqstan jáne Qostanaı óńirlerindegi kúnniń kúrt jylynýymen jaǵalasa kelgen tabıǵı apattarǵa toqtalǵan Tótenshe jaǵdaılar mınıstri Jambyl oblysy men Taraz qalasynda uıytqyp soqqan qatty jeldiń zardaptaryn joıý jumystary jaıly da aıtyp ótti. Esterińizde bolsa, jyldamdyǵy sekóntine 52 metrge jetetin dúleı daýyl myńdaǵan turǵyndy jylý men jaryqsyz ǵana emes, baspanasyz da qaldyrǵan bolatyn.
Bir sátte 21 adamnyń ómirin jalmaǵan Kókshetaý – Almaty baǵytyndaǵy ushaq apatynyń aýyr qaıǵysyn da el jadynan áli shyǵara qoıǵan joq. Túrik «Skaı Eırlaıns» áýekompanııasynyń bankrotqa ushyraýyna baılanysty Antalııada eriksiz «qańtarylyp» qalǵan qazaqstandyq jolaýshylarǵa kómek qolyn sozý kezinde de talaı kedergiler bolǵany barshaǵa belgili.
Tabıǵattyń tosyn minezinen ǵana emes, tehnıkalyq aqaýdan ta týyndaǵan osy tótenshe jaǵdaılardyń barlyǵy órt sóndirýshiler men qutqarýshylarǵa biraz salmaq saldy. Túptep kelgende, bul apattar tek Tótenshe jaǵdaılar mınıstrligine ǵana emes, quzyrly organdardyń kez kelgenine qaýyrt jumysty úıip-tókkeni anyq.
Naqty derektermen sóılegen Vladımır Bojko osy jyldyń 11 aıynda TJM-niń kúsh qurylymy 51 myńnan astam apattyq-qutqarý jumysyna qatysqanyn aıta kelip, 6236 adamnyń qutqarylǵanyn habarlady. Apatty oqıǵalar kezinde 3 myńnan astam jábirlenýshige alǵashqy medısınalyq kómek kórsetilip, tótenshe jaǵdaı oshaǵynan 6277 adam shyǵarylǵan.
«Tilsiz jaýmen arpalysyp, tabıǵattyń qatal minezine toıtarys berip júrgen qyzmetkerlerimizdiń keı is-áreketterin naǵyz erlik, kózsiz batyrlyq dep baǵalaýǵa bolady. Bul sózimizge aǵymdaǵy jyly memlekettik marapattarǵa ıe bolǵan 26 TJM qyzmetkeriniń orden- medaldary dálel bola alady», dedi mınıstr.
Brıfıng barysynda V.Bojko taıaýda ǵana Úkimettiń keńeıtilgen otyrysynda el Prezıdenti Nursultan Nazarbaevtyń quqyq qorǵaý organdarynyń kásipkerlik qyzmetke aralaspaýyn jáne bızneske ákimshilik qysym kórsetýin azaıtý týraly tapsyrmasynyń oryndalý barysyna da toqtalyp ótti. «Esterińizde bolsa, bul máselege Elbasy Qazaqstan Respýblıkasy Prezıdentiniń «Altyn sapa» arnaıy syılyǵynyń laýreattaryn marapattaý rásiminde de erekshe ekpin bergen bolatyn, – dedi TJ mınıstri. – Osyǵan oraı bul baǵytta búgingi tańda jedel jumystar qolǵa alyndy. Naqtyraq aıtar bolsaq, túrli 199 qujattyń sany 168-ge qysqartylyp, bes úrdis eskertýmen almastyryldy. Sonymen qatar, órt qaýipsizdigine baılanysty qujattar – 9, al óndiristik qaýipsizdikke oraı is qaǵazdary 10 esege azaıdy».
Apattyń aldyn alý, onyń saldaryn joıýdan áldeqaıda tıimdi, eń bastysy – arzanǵa túsetinin aıtyp ótken V.Bojko Memleket basshysynyń tapsyrmasy boıynsha jyl basynan bastap kóktemgi sý tasqyndarynyń aldyn alý baǵytynda tyńǵylyqty daıyndyqtar júrgizilgenin de málim etti. «Ǵasyr qurylysy» atanǵan Ońtústik Qazaqstan oblysyndaǵy Kóksaraı sý qoımasynyń kóktemde sý tasqynynan, aptap jazda, kerisinshe, qýańshylyqtan zardap shegip kelgen Ońtústik Qazaqstan men Qyzylorda oblystarynyń eń basty túıtkilderin sheship bergenine erekshe toqtalǵan mınıstr: «Strategııalyq mańyzy bar bul nysan 2,5 mıllıon halyq shoǵyrlanǵan eki oblysty aýyzsýmen qamtamasyz etip qana otyrǵan joq, óńirdegi aýyl sharýashylyǵynyń órkendeýine de oń yqpalyn tıgizýde», dedi.
Jańa jyl merekesiniń sánine aınalǵan ot-shashýdyń qaýip-qaterin de qaltarysta qaldyrmady V.Bojko. «Pırotehnıkany qoldaný kezinde oń-solyn tanyp bolmaǵan balany bylaı qoıǵanda, esi kirgen úlkenderdiń ózderi qarapaıym qaýipsizdikti saqtaı bermeıdi. Sol sebepti TJM qyzmetkerleri mereke qarsańynda órt qaýipsizdigin saqtaýǵa baǵyttalǵan tekserý is-sharalarynyń sheńberin keńeıtip otyr. Sondyqtan da eresekterdiń qulaǵyna altyn syrǵa, sizder kóńil kótergenmen, oılamaǵan jerden ot shyǵaryp jiberetin qaýipsizdiktiń eshqashan qalǵymaıtynyn esterińizde bolsyn. Sebebi, qaýip-qater bir sát te «masaımaıdy», dedi ol ázil-shyny aralas.
Sóz oraıy kelgende aıta keteıik, aıaz kúshine mingeli beri TJM qyzmetkerleri kúre joldarda qar qursaýynda qalyp qoıǵan 637 adamnyń ómirin aman saqtap qalǵan. Qystyń qaharyna ilikkenderdiń 75-i jazdyq janar-jaǵarmaımen uzaq jolǵa shyqqan О́zbekstan Respýblıkasynyń azamaty.
Respýblıka kóleminde tegin ári táýlik boıy jumys isteıtin biryńǵaı «112» qutqarý qyzmetiniń nómiriniń burynnan iske qosylǵanyn taǵy bir ret eske salyp ótken V.Bojko qarapaıym halyqtyń bul týraly bile bermeıtinine qynjylys bildirdi.
Halyq tarapynan úlken suranysqa ıe bolǵan TJM-niń «Densaýlyq», «Járdem» jáne «Salamatty Qazaqstan» medısınalyq poıyzdary sony tehnıkalyq quraldarmen jabdyqtalǵan. Aǵymdaǵy jyly bul poıyzdar barlyq oblystyń shalǵaı jatqan 276 beket turǵyndaryna, naqtyraq aıtsa, 63 myń halyqqa járdem kórsetip, 700-ge jýyq emhanalyq ota jasalǵan.
Sondaı-aq, brıfıng kezinde Parlament Májilisiniń birinshi oqylymynda maquldanǵan «Azamattyq qorǵanys týraly» zań jobasynyń basymdyqtary, TJM qurǵan shuǵyl medısınalyq qutqarý den qoıýdyń biryńǵaı júıesi, Kókshetaý tehnıkalyq ınstıtýty bazasynda jańadan ashylǵan «TJ-daǵy qorǵanys», «Azamattyq qorǵanys jáne áskerı daıyndyq» mamandyqtary, sondaı-aq, Reseı men Belarýs TJM-niń joǵary oqý oryndarynda bilim alyp jatqan 35 qazaqstandyq kýrsant, Gvatemala, Lıvan, Shrı-Lanka men Aýǵanstanǵa berilgen gýmanıtarlyq kómek jaıly da aqpar berildi.
Sóz sońynda Tótenshe jaǵdaılar mınıstri Vladımır Bojko eldegi oqys oqıǵalardyń sanyn azaıtyp, aldyn alýdyń keshendi is-sharalary aldaǵy ýaqytta da keń kólemde júrgiziletinin aıtyp ótti.
Baný RAHYMBAIQYZY,
jýrnalıst.
