Asqar Mamın Nur Otan-nyń saılaýaldy baǵdarlamasyn iske asyrý jónindegi shtab qurýdy tapsyrdy

Ekonomıkanyń, bank salasynyń jaı-kúıi, respýblıkalyq bıýdjettiń atqarylýy, memlekettik satyp alýdaǵy jergilikti qamtý týraly ulttyq ekonomıka mınıstri Áset Erǵalıev, Ulttyq bank tóraǵasy Erbolat Dosaev, qarjy mınıstri Erulan Jamaýbaev, ónerkásip pen energetıka sektoryndaǵy jaǵdaı týraly ındýstrııa jáne ınfraqurylymdyq damý mınıstri Beıbit Atamqulov jáne energetıka mınıstri Nurlan Noǵaev, agroónerkásiptik keshendegi jaǵdaı týraly aýyl sharýashylyǵy mınıstri Saparhan Omarov, ınvestısııalar tartý týraly Premer-Mınıstrdiń orynbasary – syrtqy ister mınıstri Muhtar Tileýberdi, «Nur Otan» partııasynyń saılaýaldy baǵdarlamasyn iske asyrý jónindegi jol kartasynyń is-sharalaryn oryndaý tetikteri týraly Premer-Mınıstrdiń birinshi orynbasary Álıhan Smaıylov baıandady.

Bıylǵy qańtar aıynda ekonomıkanyń negizgi salalary kórsetkishterdiń jaqsarý úrdisine ıe. Bul rette karantındik sharalardyń saqtalýy men kúsheıýi kórsetiletin qyzmetter men kólik salalaryna áser etýde.

О́ńdeý ónerkásibinde turaqty dınamıka baıqalyp otyr, ol jyl basynan beri 3%-ǵa ósti. О́simniń negizgi qozǵaltqyshtary metallýrgııa óndirisi (+3,1%), onyń ishinde avtomobıl jasaýdy qosa alǵanda (+21,2%), mashına jasaý (+16,2%), tústi metaldar óndirisi (+6,6%), sondaı-aq hımııa ónerkásibi (+12,8%), qurylys materıaldary óndirisi (+11,8%) jáne farmasevtıka (+4%) boldy.

Qurylys kólemi 7%-ǵa, turǵyn úıdi paıdalanýǵa berý 9,4%-ǵa nemese shamamen 801 myń sharshy metrge ulǵaıdy. Aýyl sharýashylyǵynda óndiris kólemi 2,5%-ǵa artty.

OPEK+ kelisimderi aıasynda munaı óndirýdi qysqartý boıynsha Qazaqstannyń mindettemelerin oryndaýyna baılanysty taý-ken óndirisi sektory ulttyq ekonomıkanyń baıaýlaýynyń negizgi faktoryna aınaldy. Munaı óndirýdiń naqty kólem ındeksi -12,3%-dy qurady. Sonymen qatar kómir óndirisi joǵary qarqynmen ósýde (+10,1%).

Negizgi kapıtalǵa salynǵan ınvestısııalardyń ósýi taý-ken óndirisin esepke almaǵanda 25,5%-dy qurady. Qyzmet kórsetý sektorynda aqparat jáne baılanys salasynda joǵary ósý qarqynyna qol jetkizildi (+9,4%)

Ekonomıkanyń turaqtylyǵy jumyssyzdyq deńgeıin 5%-ǵa deıingi dıapazonda ustap turýǵa múmkindik berdi.

Epıdemıologııalyq jaǵdaı baqylaýǵa alynǵan, azamattardyń qaýipsizdigin qamtamasyz etý úshin keıbir óńirlerde belgili bir shekteýler áli de qoldanylyp otyr.

Aqmola, Aqtóbe, Almaty, Jambyl, Qostanaı oblystary, sondaı-aq Nur-Sultan, Almaty jáne Shymkent qalalary negizgi 7 kórsetkishtiń 5-i boıynsha áleýmettik-ekonomıkalyq damý ósimin qamtamasyz etti. Qaraǵandy, Qyzylorda, Pavlodar, Túrkistan jáne Shyǵys Qazaqstan oblystarynda 4 kórsetkish boıynsha oń dınamıkaǵa qol jetkizildi.

«Mınıstrlikter men ákimdikter jumysty jandandyryp, tıisti sharalar qabyldap, belgilengen maqsattar men mindetterdi naqty oryndaýy qajet», — dep A. Mamın, el ekonomıkasyna ınvestısııalar tartý kólemin arttyrýdyń mańyzdylyǵyna erekshe nazar aýdardy.

Úkimet basshysy eki kún merzimde «Nur Otan» partııasynyń saılaýaldy baǵdarlamasyn iske asyrý jónindegi shtab qurýdy tapsyrdy. Onyń otyrystaryn apta saıyn Premer-Mınıstrdiń birinshi orynbasary, aı saıyn Premer-Mınıstr ótkizetin bolady.

Shtabtyń jumys organy bolyp Ulttyq ekonomıka mınıstrligi belgilendi, oǵan osy jyldyń 1 naýryzyna deıin jol kartasy kórsetkishteriniń sıfrlyq kartasyn ázirleý tapsyryldy.