«AquaPAC» qurylǵysy aýadan aýyz sý alýǵa qaýqarly. Ǵalamdyq máselelerdi sheshýge baǵyttalǵan joba avtorlyq quqyqqa da ıe.
«Álem boıynsha jylyna 2 mıllıonnan astam adam sapasyz sý saldarynan qaıtys bolady. Aýyz sýdyń jetispeýshiliginen adamdar tuzdy nemese lastanǵan sý ishýge májbúr. Bul derekter zertteý barysynda anyqtalyp, jobanyń ózekti ekendigine dálel. Al biz oılap tapqan qurylǵynyń kómegimen aýadan sý alýǵa bolady: aldymen kondensasııa ádisi arqyly bý suıyqtyqqa aınalady, súzgiden ótedi jáne ýltrakúlgin sáýleler arqyly óńdeledi», deıdi joba avtorynyń biri Arman Jalǵasbaev.
«AquaPAC» jobasynyń taǵy bir ereksheligi – salmaǵy jeńil ári kólemi yqshamdy. Sý qurylǵynyń ishinde ornalasqan arnaıy bótelkeniń ishine jınalady. Jetekshisi Jánibek Jankýlovtyń sózinshi, bul ónertabys tutynýshyny 1 táýlikke jetetin sý qorymen qamtamasyz ete alady.
«Oqýshylar álemdik deńgeıdegi máselelerdiń sheshý joldaryn qarastyrady. Birneshe jyl buryn týyndaǵan ıdeıany iske asyryp otyrmyz, jobany qarapaıym qoljetimdi materıaldardan jasadyq. Birneshe eksperımentten keıin qurylǵynyń jaramdy ekendigine kózimiz jetti», dep bólisti Nazarbaev zııatkerlik mektebiniń muǵalimi Jánibek Jankýlov.
Aıta ketý kerek, Aqtóbedegi NIS oqýshylary jyl saıyn 100-ge jýyq ınnovasııalyq jobalar jasap, respýblıkalyq jáne halyqaralyq deńgeıdegi jarystarda joǵary nátıje kórsetip keledi.
