Halyqaralyq EDU Stream oqý ortalyǵy men Express Publishing baspasy birigip uıymdastyrǵan baıqaýǵa elimizdiń túkpir-túkpirinen 150-ge jýyq beınerolık kelip túsken. Almaty, ShQO, Qaraǵandy, Aqmola, Mańǵystaý, Atyraý, Aqtóbe, Túrkistan, Pavlodar, Qostanaı óńirlerinen qatysqan balalardyń bir mınýttyq rolıginde kitapqa, bilimge degen súıispenshilik sezimi baıandalady. О́nerli jasóspirimder tyń joba barysynda sıýjetke ssenarıı jazýǵa, beınemontaj jasap, ózderin kamera aldynda erkin ustaýǵa talpynǵan.
О́tken jyldyń 14 jeltoqsany men bıylǵy 1 aqpanǵa deıingi aralyqty qamtyǵan saıys qorytyndysy qazylar alqasynyń sheshimi men kórermen kózaıymy, ıaǵnı EDU Stream-niń ınstagram paraqshasynda eń kóp laık pen pikir jınaǵandar sanaty boıynsha shyǵaryldy.
Baıqaý nátıjesinde Mańǵystaý oblysy, Munaıly aýdany № 6 mektebiniń 5-synyp oqýshysy Almas Talashan «Kórermen kózaıymy» atanyp, ınstagramda eń kóp laık pen pikir jınasa, al qazylar alqasynyń sheshimimen bas júlde О́skemen qalasyndaǵy №30 mekteptiń 1-synyp oqýshysy Kırıll Egorovqa buıyrdy. О́ziniń fızıkaǵa degen qushtarlyǵyn pash etken balaqaıǵa qazylar alqasy bir aýyzdan joǵary baǵa berip, jeńimpaz dep tanydy.
– Balalardyń arman-qııalyn túrli formatta jetkize bilýi maǵan óte unady. Birinshi kezekte meni qatty tańǵaldyrǵany – birinshi synyp oqýshysynyń fızıkany áli oqymaı jatyp fızıka ne úshin kerek ekenin sanaly túrde bilip otyrǵany. Baıqaý óte sátti ótti. Qazir ınstagramda, tık-tokta túrli trendter kóp, al biraq dál qazir balalarǵa osyndaı mańyzdy jobalar jetise bermeıdi. Sondyqtan «Kitap oqyǵandy jaqsy kóremin» baıqaýy ári qaraı da júıeli jalǵasyn taba berýine tilektespin, – dedi qatysýshylardyń jumysyn baǵalaǵan sarapshy, «Tengrınıýs» AA qazaq redaksııasynyń bas redaktory Ardaq Qultaı.
Aıta ketetin jaıt, qazylar alqasy quramyna tanymal jýrnalıster, qoǵam qaıratkerleri men blogerler tartyldy.
– Búgingideı ınternet damyǵan zamanda balalardyń kitap oqýdan da artta qalyp jatpaǵany meni qaıran qaldyrdy, – deıdi qazylar alqasynyń múshesi, Qazaqstannyń isker áıelder qaýymdastyǵynyń prezıdenti Raýshan Sársenbaeva. – Balalarymyzǵa mán berip, olarmen qoıan-qoltyq jumys isteý úshin mundaı baıqaýlardy áli de kóbeıte berýimiz kerek.
