Sarhat Beısenovanyń aıtýynsha, elordada barlyq jastaǵy turǵyndar arasynda COVID-19 aýrýy tirkelgen. Qańtar aıynda 3 763 jaǵdaı, al aqpan aıynyń basynan beri 2 192 jaǵdaı tirkeldi.
«Sońǵy aptada aldyńǵy aptamen salystyrǵanda syrqattanýshylyqtyń 7,13%-ǵa tómendegeni baıqalady. 100 myń turǵynǵa shaqqandaǵy qarqyndy kórsetkish 55,58, reprodýktıvti san 0,971-di qurady. Qala turǵyndary arasynda aýyrǵandardyń 24,7% negizgi úlesin ádettegideı 30-39 jastaǵy adamdar quraıdy. 50 jáne odan joǵary jastaǵy adamdar – 23,4%, 18-29 jastaǵy jas tobyna 18,4%, 40-49 jastaǵy adamdarǵa 14,9% jatady. Al balalar jalpy kórsetkishtiń 15,9%-yn alady», dedi elordanyń bas sanıtarlyq dárigeri.
Oqý jylynyń basynan 22 aqpanǵa deıingi jaǵdaı boıynsha oqýshylar arasynda KVI juqtyrǵan 1 017 jaǵdaı tirkeldi. Onyń ishinde 232 jaǵdaı – kezekshi synyp oqýshylary arasynda, 785-i qashyqtan oqıtyn oqýshylardan anyqtaldy.
Búginge deıin 79 mektep karantınge jabyldy, al qazirgi ýaqytta 21 mektep karantınde qalyp otyr.
Koronavırýs ınfeksııasy mektepke deıingi uıymdarǵa baratyn 94 baladan anyqtaldy.
«Qazirgi ýaqytta 907 otbasy karantınde, al onda baılanysta bolǵan 2 260 adam medısınalyq baqylaýda tur. Qalada táýliktik qýattylyǵy 12 855 zertteý bolatyn koronavırýstyq ınfeksııany dıagnostıkalaý boıynsha 23 zerthana bar. Ortasha eseppen táýligine 5 000-ǵa deıin zertteý júrgiziledi», dep habarlady spıker.
Esterińizge sala keteıik, 30 qańtardan bastap elorda epıdemıologııalyq jaǵdaı boıynsha «sary aımaqta» tur. Bul rette qalada kún saıyn 50-den 130-ǵa deıin jaǵdaı tirkeledi. Sanıtarlyq dárigerdiń aıtýynsha, aýrýdyń jalǵasýy tek testilenetin adamdar sanynyń artýymen ǵana emes, sonymen qatar qala turǵyndarynyń shekteý sharalaryn saqtamaýymen de baılanysty.
Bas sanıtarlyq dáriger qala turǵyndary men qonaqtaryn ınfeksııa juqtyrý qaýpin boldyrmaý úshin karantındik rejım men sanıtarlyq normalardy qatań saqtaýǵa shaqyrdy.
