Tehnologııa • 23 Aqpan, 2021

«AquaPAC» qurylǵysy aýyz sý tapshylyǵyn joıa alady

9 ret kórsetildi

Aqtóbe qalasyndaǵy fızıka-matematıkalyq baǵyttaǵy Nazarbaev zııatkerlik mektebiniń 11 synyp oqýshylary Arman Jalǵasbaev, Tólegen Aıtenı jáne Ernur Janǵalıev shalǵaıdaǵy eldi mekenderde oryn alǵan sý tapshylyǵy máselesin zerttep, onyń sheshimin tapty.

«AquaPAC» qurylǵysy aýadan aýyz sý alýǵa múmkindik beredi. Ǵalamdyq máselelerdi sheshýge baǵyttalǵan joba avtorlyq quqyqqa da ıe.

«Álem boıynsha jylyna 2 mıllıonnan astam adam sapasyz sý saldarynan qaıtys bolady. Aýyz sýdyń jetispeýshiliginen adamdar tuzdy nemese lastanǵan sý ishýge májbúr. Bul derekter zertteý barysynda anyqtalǵandyqtan jobanyń ózekti ekendigine dálel. Al biz oılap tapqan qurylǵynyń kómegimen aýa­dan sý alýǵa bolady: aldymen kondensasııa ádisi arqyly bý suıyqtyqqa aınalady, súzgiden ótedi jáne ýltrakúlgin sáýleler arqyly óńdeledi», deıdi joba avtorlarynyń biri Arman Jalǵasbaev.

«AquaPAC» jobasynyń taǵy bir ereksheligi – salmaǵy jeńil ári kólemi yqshamdy. Sý qurylǵynyń ishinde ornalasqan arnaıy bótelkeniń ishine jınalady. Bul ónertabys tutynýshyny
1 táýlikke jetetin sý qorymen qamta­masyz ete alady.

«Oqýshylar álemdik deńgeıdegi máse­lelerdiń sheshý joldaryn qarastyrady. Birneshe jyl buryn týyndaǵan ıdeıa­ny iske asyryp otyrmyz, jobany qarapaıym qoljetimdi materıaldardan jasadyq. Birneshe eksperımentten keıin qurylǵynyń jaramdy ekendigine kózimiz jetti», deıdi Nazarbaev zııatkerlik mektebiniń muǵalimi Jánibek Jankýlov.

Aıta ketý kerek, Aqtóbedegi NIS oqýshylary jyl saıyn 100-ge jýyq ınnovasııalyq jobalar jasap, respýb­lıkalyq jáne halyqaralyq deńgeıdegi jarystarda joǵary nátıje kórsetip keledi.

Uqsas jańalyqtar