«Memleket basshysynyń tapsyrmasyna sáıkes, otandyq farmasevtıkalyq keshende vaksınanyń ónerkásiptik óndirisi qysqa merzimde jolǵa qoıyldy. Búgin Qazaqstannyń barlyq óńirine “Gam-KOVID-Gak” vaksınasynyń 90 myń dozasy jóneltiledi. 2021 jylǵy naýryzda 150 myń dozasyn óndirý josparlanyp otyr, al sáýir aıynan bastap 600 myń dozaǵa deıin jetkiziledi. Osylaısha, halyqty josparly túrde COVID-19-ǵa qarsy vaksınamen jetkilikti mólsherde qamtamasyz etemiz», dedi vıse-premer E. Toǵjanov.
«SQ-Farmasııa» JShS men Reseı tikeleı ınvestısııalar qory (RFTIQ) arasynda jasalǵan ózara túsinistik týraly kelisim aıasynda 2 mln astam doza jetkizý, preparat synaqtyń barlyq satysynan ótkennen keıin ony 5 mln dozaǵa deıin arttyrý josparlanýda.
Esterińizge sala keteıik, 2020 jylǵy 11 qarashada QR Prezıdenti Qasym-Jomart Toqaev pen RF Prezıdenti Vladımır Pýtın telefon arqyly sóıleskende pandemııamen kúreste yntymaqtastyqty jandandyrýdy, sonyń ishinde QR aýmaǵynda birlesip vaksına óndirisin uıymdastyrý jónindegi josparlardy talqylady.
«Densaýlyq saqtaý mınıstrligi jumys tobyn qurdy, onyń quramyna QR DSM, RFTIQ beıindi vedomstvolarynyń basshylary jáne QFK mamandary kirdi. Qysqa merzimde tehnologııa transferi júrgizilip, óndiristi daıyndap, qyzmetkerlerdi oqyttyq. Búgin Qazaqstan Respýblıkasynda «Spýtnık V» vaksınasynyń tolyqqandy óndirisin iske qosamyz», dedi A. Soı.
«Bizge qysqa merzimde reseılik «Spýtnık V» vaksınasynyń óndirisin bastaý mindeti qoıyldy. QR Densaýlyq saqtaý mınıstrligi 4 jeltoqsanda tehnologııa ıesi – RF-nyń «Reseı tikeleı ınvestısııalar qory» memlekettik kompanııasymen yntymaqtastyq týraly kelisimge qol qoıdy jáne 13 jeltoqsanda bizge daıyn ónimniń valıdasııalyq serııalaryn óńdeýge arnalǵan sýbstansııa berdi», dedi QFK bas dırektory Sergeı Baron.
2020 jylǵy 4 jeltoqsanda RFTIQ Densaýlyq saqtaý mınıstrligimen yntymaqtastyq týraly kelisim jasady jáne 2020 jylǵy 13 jeltoqsanda «Qaraǵandy farmasevtıka kesheni» JShS preparattyń tájirıbelik serııasyn óndirý úshin 6 myń doza kóleminde sýbstansııa aldy.
2020 jyldyń 24 jeltoqsanynan 2021 jyldyń 21 qańtaryna deıin vaksına N.F. Gamaleıa atyndaǵy ortalyqta birneshe ret sapa boıynsha synaqtan ótip, 2021 jyldyń 15 aqpanynda ol QR-da tirkeldi.
