«Jeti jasymda qulaǵym otıt bolyp aýyrǵan. Aýrýhanada 20 kúndeı em alyp shyqqanym bar, – dep esine alady Muhtar. – Biraq sol kezde qulaǵymdy sońyna deıin emdemepti, keıin sol qulaǵym birtindep nashar estı bastady. О́zimniń týǵan qalam Qyzylorda jáne Almaty, Astana qalalaryndaǵy kóptegen dárigerge qaraldym. Tipti Germanııadan kelgen dárigerdiń de konsýltasııasyna baryp, taldaýlarymdy Túrkııaǵa jibergenmin. Barlyq jerden alǵan jaýabym bir boldy: «Arada kóp ýaqyt ótip ketken, estý qabiletin qaıta qalpyna keltirý múmkin emes». Maǵan tımpanoskleroz, otoskleroz degen dıagnozdar qoıyldy. Men endigi oǵan da kóngen edim».
Biraq byltyr Muhtar ózine kómek qolyn soza alatyn dárigerlerdi izdeýdi qaıta bastaıdy. «Internetten dáriger Talapbek Ájenovti taýyp aldym. Ol týraly kóptegen jaǵymdy pikirler jazylypty, – dep jalǵastyrdy Muhtar. – Men birden ol kisige hat jazyp, barlyq taldaýlardy jiberdim».
«Qarap kórý kerek: estý qabiletin qaıta qalpyna keltirý múmkin sııaqty». Osy sózderdi estigen Muhtar birden tekserilýge kelýge sheshim qabyldaıdy: «Konsýltasııa kezinde Talapbek Muratuly júıkeniń bútin ekenin jáne estý qabiletin qalpyna keltirýge múmkindik bar ekenin aıtty. Men operasııaǵa kelise kettim».
2021 jyldyń 2 aqpanynda Muhtarǵa operasııa jasaldy, operasııa barysynda ol birden estý qabiletiniń jaqsarǵanyn sezgen: «Maǵan operasııany jergilikti narkozben jasady, uıyqtamaı, bárin sezip jattym. Dárigerler qulaǵyma ımplantty salǵan boıda, qaıta estı bastadym. Buryn-sońdy mundaı bolmaǵan: men bulaı estimegeli kóp bolǵan edi. Sońǵy nátıjesi dákeni sheshkennen keıin belgili bolady, degenmen estı bastaǵanymdy ishteı sezemin», deıdi qýanyshyn jasyra almaǵan pasıent.
Dáriger-otorınolarıngolog, Prezıdenttik klınıkanyń №1 hırýrgııalyq bólimshesiniń meńgerýshisi Talapbek Ájenovtiń aıtýynsha, Qazaqstan boıynsha mundaı jaǵdaılar óte kóp: «О́kinishke qaraı, tolyq tekserilmegendikten mundaı pasıentter sırek emes. Olarǵa keminde eki saraptama júrgizý qajet: aýdıometrııa jáne ımpedansometrııa. Eger birinshi zertteý qulaqtyń estigishtigin kórsetse, ekinshisi estý súıekteriniń jarylýy nemese qulaq jarǵaǵyndaǵy aqaýdyń bar-joǵyn anyqtaıdy. Muhtardyń qulaq jarǵaǵyn tekserý kezinde estý súıeksheleri tizbeginiń bútindigi buzylǵanyn anyqtadyq. Qalypty jaǵdaıda bul súıeksheler janasyp turýy kerek, olar dybysty estýge kómektesedi. Muhtarda kelesi jaǵdaı oryn alǵan: tóstiktiń lentıkýlıarlyq óskini úzeńgimen qosylmaı turǵan. Sondyqtan da qulaq estimegen. Aıtpaqshy, eshqandaı skleroz tabylǵan joq».
Talapbek Muratuly operasııa jaıly da aıtyp ótti: «Bul operasııa, ossıkýloplastıka – «zergerlik operasııa». Ol jergilikti narkozben jasalady. Bul Muhtarda bolǵan jaǵdaıdaǵydaı, dárigerlerge manıpýlıasııanyń áserin operasııa kezinde birden kórýge múmkindik beredi. Osyǵan uqsas operasııalar jalpy narkozben jasalady: pasıent uıyqtap jatqandyqtan, biz manıpýlıasııanyń áserin birden «dál sol sátte» baǵalaı almaımyz. Sondaı-aq bul operasııa qulaqtyń artyn azdap tilip qana jasalady. Onyń ornyna biz operasııany endaýraldy túrde, ıaǵnı qulaqtyń ishinde jasaımyz. Bul ádis kezinde qulaq jarǵaǵynda birneshe kishkene tesik jasalady. Osydan keıin qarap otyryp, jyrtylǵan jerdi anyqtap, estý súıeksheleriniń tizbegin qalpyna keltire alamyz».
Talapbek Muratulynyń aıtýynsha, mundaı operasııa estý qabiletiniń kondýktıvtik joǵalýy oryn alǵan kóptegen jaǵdaıda jasalady. Bul dybystyń ótýine kedergi keltiretin estý qabiletiniń buzylýy. «Qulaqtyń estýine qatysty problemalary bar barlyq adamdy tekserýge, estý qabiletin qaıta qalpyna keltirip kórýge bolady. Biz árdaıym pasıentterimizge kómektesýge tyrysamyz, naqty problemasyn anyqtap, ony sheshýge tyrysamyz», dep áńgimesin aıaqtaǵan Talapbek Muratuly pasıentine tez saýyǵyp ketýin tiledi.
