Telehıkaıa oqıǵasy telearnadan kórinip, ataqty bolýdy armandaıtyn keıipkerdiń basynan keshkenderi boıynsha órbıdi. Balalar úıinde tárbıelengen basty keıipkerdiń «teledıdardan kórinsem, ata-anam meni taýyp alady» degen úzilmes úmiti bar. Onyń maqsatyna jetý jolyndaǵy qadamdary «Tańsholpan» baǵdarlamasynyń tynys-tirshiligin, ujymynyń jankeshti eńbegin kórsetedi.
«Bul telehıkaıa basqalardan óziniń shytyrmanǵa toly sıýjettik oqıǵasymen erekshelenedi dep tolyq aıta alamyn. Basty keıipkerdiń óziniń arman-maqsaty jolyndaǵy áreketteri, tabandylyǵy kórermenge oı salatyny anyq. Jýrnalısterdiń, ekran syrtyndaǵy qyzmetkerlerdiń eńbegin kórsete alatyn birden-bir týyndy. Erekshe mahabbat oqıǵasy men otbasy taqyryptary da kórermendi tolǵantpaı qoımaıdy», - deıdi telehıkaıa rejısseri Tórebek Beısebaev.
«Tańsholpan» - qazaqstandyq kınematografııa tarıhyndaǵy telebaǵdarlamaǵa arnalǵan alǵashqy otandyq serıal. Shyǵarmashylyq toptyń aıtýynsha, keıipkerler arasynda naqty prototıpter joq, dese de, tolyqtaı tańǵy baǵdarlamanyń tabıǵatyn ashýǵa baǵyttalǵan.
Basty keıipkerlerdi somdaıtyn akterler arasynda Aıan О́tepbergen, Gúlnaz Jolanova, Qýanysh Kerimqulov, Áıgerim Územbaeva bar. 12 bólimdi telehıkaıa «Qazaqstan» Ulttyq telearnasynan 25 aqpannan bastap dúısenbi-juma aralyǵynda 21:30-da efırge shyǵady.
