«Elimizde kóptegen kásibı mereke bar: Muǵalimder kúni, Energetıkter kúni, Qarjygerler kúni jáne taǵy basqa. Alaıda bul merekeler tiziminde Sport jattyqtyrýshysy kúni joq. Sondyqtan biz Sport jattyqtyrýshysy kúnin kásibı merekeler kúntizbesine resmı túrde engizýdi usynamyz», dedi odaq tóraǵasy.
Azamat Qarlyǵashev merekeni 7 sáýirde atap ótýdi usyndy. «2021 jyldyń 7 sáýirde elimizdiń ataqty balýany Qajymuqan Muńaıtpasovtyń 150 jyldyǵyn toılaǵaly otyrmyz. Sondyqtan biz Sport jattyqtyrýshysy kúnin dál osy kúni atap ótý kerek dep sanaımyz», dedi Azamat Qarlyǵashev.
Bul bastamany KSRO-nyń bokstan 5 dúrkin chempıony, qazaqstandyq sportshylar odaǵynyń qurmetti múshesi Bolat Temirov qoldaıtynyn jetkizdi.
«Bizde eńbek sińirgen jattyqtyrýshylar kóp. Olardyń kópshiligi álem chempıondaryn tárbıelep, Qazaqstannyń atyn shyǵardy. Alaıda olardyń kásibı merekesi joq», – dedi ol. Bul pikirdi Qazaqstannyń eńbek sińirgen sport qaıratkeri Sadyq Mustafaev ta qoldady. «Qazaqstanda jattyqtyrýshylarǵa basymdyq berilmeıdi. Olar oqýshylarynyń kóleńkesinde qalyp júr. Árıne, jattyqtyrýshylarǵa memlekettik deńgeıde kóńil bólinýi kerek», dedi sport qaıratkeri.
Sonymen qatar odaq bul bastama boıynsha QR Prezıdent ákimshiligi men Mádenıet jáne sport mınıstrligine usynys hat joldaǵanyn atap ótti.
Aıta keteıik, Qazaqstan sportshylar odaǵy – burynǵy jáne qazirgi sportshylardy, dene shynyqtyrý, sport jáne týrızm qyzmetkerlerin biriktiretin elimizdegi erikti kommersııalyq emes qoǵamdyq uıym, 2020 jyldyń 21 mamyrynda qurylǵan. Qazirgi tańda odaqtyń 600-den asa múshesi bar.
