Mınıstrdiń aıtýynsha, vedomstvo ekologııalyq aǵartýdy júıeli túrde damytý úshin ekologııalyq bilim berý standartynyń jobasyn ázirleý ústinde. Qujattyń negizgi maqsaty – ekologııa taqyrybyn bilim mazmunyna ústirt qosymsha retinde emes, tárbıelik ári dúnıetanymdyq ózek retinde ornyqty engizý.
«Oqý-aǵartý mınıstrligi «Taza Qazaqstan» jalpyulttyq jobasy aıasynda keshendi ári júıeli jumysty júzege asyrýda. Osy baǵyttardyń biri – ekologııalyq bilim berý standarty. Onyń basty mindeti – ekologııa máselesin bilim mazmunynda tereń ári turaqty túrde qamtý. Konstıtýsııalyq reformalar aıasynda jańa Konstıtýsııa jobasynda tabıǵatty qorǵaý normalary naqty bekitildi. Bul azamat pen memleket arasyndaǵy ekologııalyq jaýapkershilikti kúsheıtetin mańyzdy quqyqtyq negiz», dedi mınıstr.
S.Ponomerev: «Taza Qazaqstan» – Konstıtýsııadaǵy jańa jaýapkershilik ólshemi
Sondaı-aq Juldyz Súleımenovanyń málimdeýinshe, búginde «Adal azamat» birtutas tárbıe baǵdarlamasy úsh negizgi ıdeıaǵa súıenip júzege asyrylyp otyr. Olar – eńbek adamy, «Zań men tártip» qaǵıdaty jáne «Taza Qazaqstan» jalpyulttyq bastamasy. Osylar arqyly oqýshylar men jasóspirimderdiń boıynda ekologııalyq sanany qalyptastyrý kózdelgen.
Mınıstr ekologııany tek pándik bilim sheńberinde ǵana emes, ómir salty men qundylyqtyq baǵdar retinde ornyqtyrý mańyzdy ekenin atap ótti. Tabıǵatqa jaýapkershilikpen qaraý – jas urpaqtyń azamattyq bolmysynyń ajyramas bóligine aınalýy tıis. Osy turǵydan alǵanda, ekologııalyq aǵartý jańa Konstıtýsııa jobasyndaǵy qaǵıdattarmen sabaqtasyp, uzaqmerzimdi qoǵamdyq damýdyń irgetasyn qalyptastyrady.
