Investısııalar, kólik pen logıstıka, sıfrlyq sala men JI, ónerkásip, qurylys, aýyl sharýashylyǵy, týrızm, bilim berý jáne taǵy da basqa salalardaǵy ózara is-qımyl máselelerine nazar aýdaryldy.
«Búgin Siz Memleket basshysy Qasym-Jomart Kemeluly Toqaevpen nátıjeli kelissóz júrgizdińiz. Qazaqstan Úkimeti joǵary deńgeıde qol jetkizilgen barlyq ýaǵdalastyqtyń oryndalýyn erekshe baqylaýǵa alady. Bizdiń derekterimiz boıynsha, 2025 jyly ózara saýda kólemi 107,7 mln dollardy qurap, ótken jylmen salystyrǵanda 7,6%-ǵa ósti. Bul kórsetkish odan da aýqymdy nátıjelerge qol jetkizý úshin ońtaıly negiz bola alady. Biz uzaqmerzimdi yqpaldastyqty odan ári jalǵastyrýǵa nıettimiz», dedi O.Bektenov.
Serbııa Prezıdenti Aleksandr Výchıch elimizben energetıka, qorǵanys ónerkásibi, qurylys, azamattyq avıasııa, jasandy ıntellekt jáne aqparattyq tehnologııalar, sondaı-aq bilim sııaqty perspektıvaly baǵyttar boıynsha áriptestikti damytýǵa umtylysyn rastady.
«Qazaqstan Prezıdenti Qasym-Jomart Toqaev ekeýmiz seriktestik aıasyndaǵy barlyq úderisti tikeleı qadaǵalap otyramyz. Sondaı-aq bul iske bizdiń elderdiń úkimetteri de belsendi qatysyp otyrǵanyn jaqsy bilemiz. Bizge Qazaqstannyń bilim salasyndaǵy tájirıbesi qyzyqty. Osyǵan baılanysty qazaqstandyq sarapshylardy sheteldik joǵary oqý oryndarynyń kampýstaryn ashý, dýaldy bilim berýdi damytý, stýdentterdi shetelde oqytý tájirıbesimen bólisý úshin Serbııaǵa shaqyrǵymyz keledi», dedi Serbııa Prezıdenti.
Kezdesý barysynda Serbııamen sıfrlyq transformasııa salasyndaǵy yntymaqtastyqty keńeıtý áleýeti úlken ekeni atap ótildi. Elimizde Memleket basshysy jarııalaǵan Sıfrlandyrý jáne jasandy ıntellekt jyly aıasynda zamanaýı sıfrlyq ekojúıe qalyptasyp jatyr. Ortalyq Azııada eki sýperkompıýter klasteri iske qosyldy, «Alem.ai» halyqaralyq jasandy ıntellekt ortalyǵy quryldy, «CryptoCity» pılottyq aımaǵy, taǵy da basqa da jobalar júzege asyrylyp jatyr.
Kólik ıntegrasııasy máselelerin talqylaý kezinde Orta dálizdi damytýǵa jáne elimizde júrgizilip jatqan jańa ınfraqurylymdy salý jumystaryna, onyń ishinde temirjol men avtokólik jelileri, teńiz termınaldary men halyqaralyq avıasııalyq habtardy qurýǵa erekshe nazar aýdaryldy.
Agroónerkásip sektoryndaǵy, onyń ishinde seleksııa men tuqym sharýashylyǵy salasyndaǵy áriptestikti tereńdetý perspektıvalary da atap ótildi. Oljas Bektenov otandyq óndirýshilerdiń joǵary sapaly aýyl sharýashylyǵy ónimderiniń keń assortımentin eksporttaýǵa, qaıta óńdeý salasyndaǵy yntymaqtastyqqa ázir ekendigin jetkizdi.
Belgradta ótetin «EXPO 2027» kórmesin eskere otyryp, elimiz Serbııamen 2017 jyly Astanada mamandandyrylǵan kórmeni ótkizý kezinde jınaqtaǵan tájirıbesin bólisýge daıyn.
Kezdesý qorytyndysynda Premer-mınıstr Oljas Bektenov pen Serbııa Prezıdenti Aleksandr Výchıch barlyq perspektıvaly baǵyttar boıynsha ekijaqty yntymaqtastyqty serpindi damytý men nyǵaıtýǵa beıildi ekenin bildirdi.
Sonymen qatar Aleksandr Výchıch elimizge resmı sapary aıasynda otandyq qorǵanys ónerkásibiniń, onyń ishinde qorǵanys-ónerkásip kesheni salasyndaǵy qazaq-serb birlesken jobalarynyń kórmesine, «Astana» halyqaralyq qarjy ortalyǵyna (AHQO), «Alem.ai» halyqaralyq jasandy ıntellekt ortalyǵyna bardy.
AHQO-da ortalyq jumysynyń negizgi baǵyttary, onyń ishinde ınvestısııalardy tartý, mámilelerdi bir qurylymǵa keltirý, kapıtal naryǵyn damytý men halyqaralyq jobalarǵa qoldaý kórsetý jónindegi quraldar kórsetildi. Bıznesti servıstik qoldaý ınfraqurylymyna erekshe nazar aýdaryldy. AHQO basqarýshysy Renat Bekturov ortalyq tartqan ınvestısııalardyń jıyntyq kólemi búginde 20 mlrd dollardan asqanyn baıandady.
Aleksandr Výchıch «Alem.ai» ortalyǵynda elimizdiń sıfrlyq salany jáne JI-tehnologııalardy damytýǵa baǵyttalǵan júıeli tásilderimen tanysty.
Serbııa Prezıdentiniń nazaryna otandyq ázirlemeler men jasandy ıntellekt-startaptar usynyldy. «Astana Hub»-ta IT-startaptardy qoldaý júıesine jáne jetekshi álemdik kompanııalarmen yntymaqtastyqty damytýǵa kóńil bólindi. Sondaı-aq onda «BestVision» – ónerkásip pen taý-ken óndirisine arnalǵan AI-monıtorıngi, beınesaraptamasy men trekıngi bar aqyldy kaska ázirleýshi; «KazDream» – baǵdarlamalyq qamtamasyz etý, derekterdi taldaý jáne jasandy ıntellekt salasyndaǵy startap; «Documentolog» – elektrondyq qujat aınalymyn avtomattandyrýǵa arnalǵan ulttyq bultty servıs sııaqty otandyq startaptar tanystyryldy.
