Aja aýylynda dúnıege kelgen Qaırat Kenjebaev jas kezinde otbasymen birge qalaǵa kóshkenimen, týǵan jerimen baılanysyn eshqashan úzbegen. Keıin kásibin dóńgeletip, týǵan aýylyn damytýǵa úles qosýdy maqsat etken.
Kásipkerdiń bastamasymen aýylda mádenıet úıi, meshit jáne jańa sport kesheni salyndy. Sondaı-aq balalar oıyn alańy men fýtbol alańy jabdyqtalǵan. Al kelesi jyly aýylda balabaqsha salý josparlanyp otyr.
«Men ózimdi asa baı adammyn dep aıta almaımyn. Másele qarjyda emes, nıette. Osyndaı yqylaspen kez kelgen adam paıdaly is atqara alady. Bizdiń aýylda qazir kóptegen qandastar turady. Olar Qytaıdan tarıhı otanyna oralǵanyna shyn qýanady. Al týǵan jerinen kóship ketkenderdiń ókinish bildiretinin jıi estımin», deıdi kásipker Qaırat Kenjebaev.
О́tken jyly kásipker aýmaǵy 400 sharshy metr bolatyn sport kesheniniń qurylysyn bastaǵan. Búginde munda aýyl jastary basketbol, voleıbol, fýtbol oınap, qazaq kúresimen aınalysady.
Jergilikti jattyqtyrýshylardyń aıtýynsha, jańa sport zal jastardyń sportqa degen qyzyǵýshylyǵyn arttyrǵan. Al turǵyndar aýylda birlik pen yntymaqtyń nyǵaıyp, jastardyń eldi mekenniń damýyna belsendi aralasyp jatqanyn aıtady.
Qaırat Kenjebaev pen aýyldyń jas túlekteri jyl saıyn jańa áleýmettik jobany iske qosýdy dástúrge aınaldyrǵan. Kelesi maqsat aýyl turǵyndaryna arnalǵan turǵyn úıler salý.
«Eger ár adam óziniń týǵan jerine osylaı qoldaý kórsetse, aýdandarymyz áldeqaıda jyldam damıtyn edi. О́z tarapymyzdan kásipkerlerge jer telimderin bólýde, ınfraqurylym tartý jáne jaryqtandyrý máselelerinde qoldaý kórsetip kelemiz», deıdi Kókpekti aýdanynyń ákimi Nurbek Qoshqarbaev.
Aja aýylynda júzege asyp jatqan jobalar týǵan jerge degen janashyrlyqtyń naqty kórinisine aınalyp otyr. Belsendi azamattardyń qoldaýynyń arqasynda aýyl turǵyndarynyń ómir sapasy jaqsaryp, eldi mekenniń keleshegine degen senim nyǵaıyp otyr.
