Asanáli Áshimov atyndaǵy bul teatr 2018 jyldyń jeltoqsan aıynda Almaty qalalyq Mádenıet jáne arhıvter basqarmasyna qarasty «Almaty áýenderi» KMQK quramynda ashylǵan. Kózi tirisinde shyǵarmashylyq ujymǵa teatr tarlany, KSRO Halyq ártisi, Eńbek Eri Asanáli Áshimovtiń ózi jetekshilik etti. Teatrdaǵy qazirgi 53 akterdiń deni osy kisiniń shákirtteri, óz túlekteri.
Qazaqstan synshylar birlestigi jyl saıyn júrgizip otyratyn monıtorıngke kóz júgirtseńiz, «Jańa ǵasyr» teatry gastroldik saparlarǵa shyǵýǵa kelgende otandyq teatrlardyń ondyǵyna kiretinin kóresiz. Mysaly, ótken 2025 jyldyń ózinde bul teatr elimizdiń Taldyqorǵan, Atyraý, Aqtaý, Aqtóbe, Oral, Qyzylorda, Túrkistan, Shymkent, Taraz jáne Astana qalalaryn «Taǵdyr taqtasy», «Almaty – mahabbatym» qoıylymdarymen gastroldik issaparmen aralap shyqqan.
Aqpannyń aıaz qaryǵan sońǵy kúnderinde «Jańa ǵasyr» teatry «Almaty – mahabbatym» atty saǵynysh pen syrǵa toly sahnalyq týyndysyn tartý etti.
Respýblıka saraıyn mahabbat pen albyrt sezimderge bólegen konsert-spektakl qalyń kórermenge keshegi kúnderin oraltyp, alyp-ushqan jastyq shaǵyna qaıta jetektep ákelgendeı áser syılady.
Rýhanı keshke aınalǵan qoıylymda shahardyń ásem kelbeti ǵana emes, túrli taǵdyr ıeleriniń ómiri, olardyń mahabbaty men saǵynyshy ádemi ánmen órilip, sahnalyq kórinistermen astasyp jatty.
Kesh barysynda eski bolsa da esti, júrekke jaqyn ánder shyrqalyp, kórermen ótken men búginniń arasyna sapar shekti. Ár án – bir taǵdyr, árbir áýen – bir ǵumyr ispetti órilip, kásibı ónerdiń qudiretin sezindirdi.
Bul spektakldiń qundylyǵy da sonda, dál osy «Almaty – mahabbatym» sahna abyzy Asanáli Áshimovtiń sońǵy qoıylymy edi. Atalǵan konsert ıdeıasy ustazdarymen birge dúnıege kelip, ózi dúnıeden ozǵannan keıin sahnalanǵan qoıylym. Sondyqtan da osynaý konserttik qoıylymdy ańyz akterdiń sońǵy da alǵashqy spektakli dep aıtýǵa bolady.
Konserttik týyndyny kórýge ańyz ártistiń jary Baǵdat Áshimova kelip, júrekjardy lebizin bildirip, spektakldiń áserli shyqqanyn atap ótip ári óner ujymyna degen rııasyz alǵysyn jetkizdi. Jınalǵan jurtty tolqytqan keshke Almaty qalalyq Mádenıet basqarmasynyń basshysy Danııar Abzalıdenuly men «Jaıyqtyń aq shaǵalasy» atanǵan aqyn Aqushtap Baqtygereeva, pesa avtory Beıbit Sarybaı syndy zııaly qaýym ókilderi de qatysty.
«Almaty – mahabbatym» tek konserttik baǵdarlama emes, bul – qalaǵa degen shynaıy súıispenshilik, adam janynyń názik ıirimderin beıneleıtin sahnalyq týyndy. Spektakl arqyly kórermen Almatynyń rýhyn tereń sezinip, onyń kósheleri men taýly tabıǵatyna degen saǵynyshyn jańǵyrtty.
Mazmuny baı, sezimge toly kesh ulttyq ónerimizdiń baıraǵyn kóterip, kórermen júreginen oryn alǵan áserli mádenı oqıǵa retinde este qalady.
ALMATY
