Qoǵam • 26 Aqpan, 2021

Partııa qoǵamdyq keńesteriniń qyzmeti júıeli túrde qaıta qurylymdalady – Baýyrjan Baıbek

«Nur Otan» partııasy Tóraǵasynyń birinshi orynbasary Baýyrjan Baıbek Facebook jelisindegi paraqshasynda partııanyń aldaǵy kezeńge arnalǵan josparlarymen bólisti, dep habarlaıdy Egemen.kz.

Marzhan Tileubekova

Onyń aıtýynsha, 1 naýryzda «Nur Otan» partııasynyń qurylǵanyna 22 jyl tolady. Osynaý aıtýly kúnniń qarsańynda elimiz boıynsha myńnan astam belsendi azamat partııa qataryna qosyldy. Olardyń arasynda azamattyq qoǵam, bilim berý, densaýlyq saqtaý, ónerkásip, mádenıet pen sport salasynyń ókilderi bar.

«Elbasy, partııa Lıderi Nursultan Nazarbaev aıtqandaı, nurotandyqtardyń basty prınsıpteri – jaýapkershilik, komandalyq rýh jáne partııa ıdealdary men qundylyqtaryna berik bolý. Biz Jarǵy talaptaryna sáıkes partııalyqtardyń sapalyq quramyn jaqsartý boıynsha jumysty jalǵastyramyz. Sondaı-aq partııa jaqtastarynyń ınstıtýty keńeıtiledi», - dedi ol.

Baýyrjan Baıbek atap ótkendeı, aldaǵy elektorataralyq kezeńde Elbasy «Nur Otan»-nyń jumysyn tolyqtaı qaıta qurýdy jáne saılaýaldy ýádelerdiń iske asyrylýyna júıeli baqylaýdy qamtamasyz etýdi tapsyrdy.

«Partııa Lıderiniń fraksııalar jumysyn kúsheıtý jónindegi tapsyrmasyna sáıkes bizdiń depýtattardyń qoǵamdyq reıtıngi engiziledi. Partııalyq tizimderde rezervte turǵan 2 myńdaı azamat, sarapshylar men úkimettik emes uıymdar tartyla otyryp, partııa qoǵamdyq keńesteriniń jumysy júıeli túrde qaıta qurylymdalatyn bolady», - dep málimdedi partııa Tóraǵasynyń birinshi orynbasary.

Sondaı-aq, ol óz jazbasynda «Elektrondy partııa» jobasyn jandandyrý aıasynda Úkimetpen birlesip ár óńir, qala jáne aýdan boıynsha saılaýaldy baǵdarlamalar sheńberindegi jol kartalaryn iske asyrýǵa monıtorıng júrgizý úshin sıfrlyq platforma ázirlenetinin aıtty.

«Partııa Lıderi aıtqandaı, «Nur Otan»-nyń apparaty pandemııa kezeńinde turǵyndarmen naqty jumys júrgizýge baǵdarlanýy tıis. El kólemindegi 234 qoǵamdyq qabyldaý bólmesi ózara áreket jasaýdyń proaktıvti formatyna kóshýi tıis. Onyń ishinde áleýmettik jeliler de qamtylýy qajet. Osyǵan baılanysty alǵa qoıylǵan jańa mindetter eskerile otyryp, qoǵam qaıratkeri Álııa Sadyrbaeva partııanyń Respýblıkalyq qoǵamdyq qabyldaý bólmesiniń basshysy bolyp taǵaıyndaldy. Onyń zań jáne qoǵamdyq uıymdar salasynda 20 jyldan astam jumys tájirıbesi bar», - dep jazdy Baýyrjan Baıbek.

Sonymen qatar, sońǵy jylda bizge 393 myńnan astam ótinish kelip túskeni aıtyldy. Bul – 2019 jylmen salystyrǵanda 2 ese kóp. 5 jyl ishinde partııaǵa 1,2 mln. adam júginse, onyń ishinde 423 myńnan astamy – onlaın-formatta. Olardyń 92%-i oń sheshimin tapty, tegin konsýltatıvtik, quqyqtyq jáne ózge de kómek kórsetildi.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz