Qazaqstan • 27 Aqpan, 2021

«Qazaqstan» teleradıokorporasııasy «Myń alǵys» qaıyrymdylyq telemarafonyn ótkizedi

17 ret kórsetildi

1 naýryz – Alǵys aıtý kúnine jáne Qazaq radıosynyń 100 jyldyǵyna oraı «Qazaqstan» teleradıokorporasııasy «Myń alǵys» qaıyrymdylyq telemarafonyn ótkizedi. Sharanyń negizgi maqsaty - kómekke muqtaj jandarǵa kópshiliktiń atsalysýymen qolushyn sozý, meıirimdilikti, qaıyrymdylyqty nasıhattaý, qaıyrymdy jandarǵa alǵys aıtý.

Tikeleı efır barysynda osteogenez syrqatyna daýa izdegen bir otbasynyń balalary, 10 jáne 12 jastaǵy Nurıslam men Balnur Jumataıǵa, sozylmaly búırek aýrýyna shaldyqqan jýrnalıst Baǵdat Muhtarulyna, Túrkııa aýrýhanasynda leıkozben kúresip jatqan 3 jastaǵy aqtaýlyq Láılá Baqtybaevaǵa, tobyǵy ókshesine bitip, bel omyrtqasy aıqasyp týǵan 8 jastaǵy qyzylordalyq Zarına Nııazbekke kómek kórsetiledi. 

Sondaı-aq telemarafon barysynda «Qazaqstan» arnasynyń «Qymbat jandar» jáne Qazaq radıosynyń «Barmysyń, baýyrym» baǵdarlamasy arqyly jaqynyn izdegen 8 adam stýdııada tabysady.

«Alǵys aıtý kúnine oraı uıymdastyrylyp otyrǵan «Myń alǵys» qaıyrymdylyq telemarafony tańǵy saǵat 09.30-dan keshki 21.30 aralyǵynda 5 márte tikeleı efırge shyǵady. Ulttyq arna men Qazaq radıosynyń áleýmettik jobalary arqyly kómekke júginetinder kóp. «Qazaqstan» telearnasy kúni boıy 5 adamnyń emine qarjy jınap berý týraly sheshim qabyldady. Bul rette aıta keterligi, telearna qarjy jınaýmen aınalyspaıdy. Kórermen jiberetin aqsha tikeleı efırde kórsetilgen keıipkerlerdiń esepshotyna túsedi. Bizdiń maqsatymyz – qaıyrymdy jandar men densaýlyǵyna baılanysty qarjylaı qoldaýǵa muqtaj jandar arasynda kópir ornatyp, qolushyn sozý, demeý bolý. Osy oraıda qaıyrymdylyqtan qol úzbeı, «Myń alǵys» jobasyna atsalysyp kele jatqan kórermenderimiz ben tyńdarmandarymyzǵa, qalyń jurtshylyqqa alǵys bildiremiz», dedi «Qazaqstan» RTRK» AQ Basqarma tóraıymy Lázzat Tanysbaı.

Aıta keteıik, Qaıyrymdylyq telemarafony 1 naýryz kúni «Qazaqstan» Ulttyq telearnasy men Qazaq radıosynyń áýe tolqynynda tikeleı efırde júredi.

Sońǵy jańalyqtar

Aq úıdiń alǵashqy meımany

Álem • Búgin, 12:15

ShQO-da mal urylary ustaldy

Aımaqtar • Búgin, 11:00

Uqsas jańalyqtar