Máselen, 23 aqpanǵa deıingi jaǵdaı boıynsha bir táýlikte koronavırýs ınfeksııasynyń laboratorııalyq rastalǵan 63 deregi tirkelgen. Al sońǵy aptada, ıaǵnı 17-23 aqpanda indet juqtyrǵan 517 jaǵdaı anyqtalypty. Onyń aldyndaǵy aptada bul kórsetkish 525-ti quraǵan edi. Jalpy, pandemııa bastalǵaly oblysta 13 305 adamǵa jaman tumaý juqqany belgili bolǵan.
«Sary aımaqqa» ótpeı turyp, oblysta 90-nan astam bilim oshaǵy qashyqtan bilim berip kelse, qazirgi tańda oqýshylarǵa onlaın rejiminde bilim berip jatqan mektepter sany – 34 qana. Oqýshylardy qashyqtan oqytý rejimine kóshirýdiń nátıjesinde jaman tumaýdyń taralýy birshama azaıypty.
– Sońǵy táýlikte 7 oqýshydan COVID-19 vırýsy anyqtaldy. Olar Kókshetaý qalasy men Býrabaı, Jaqsy, Selınograd aýdandarynda turatyn, bireýi shtattyq rejimde, 6-ýy onlaın rejimde oqyǵan oqýshylar. Pandemııa bastalǵaly 761 oqýshyda vırýs laboratorııalyq turǵydan rastaldy, – degen bas sanıtarlyq dáriger Aınagúl Mýsına qazir koronavırýsqa qarsy ekpeniń ekinshi komponenti egilip jatqanyn tilge tıek etti. Sóz arasynda búginge deıin oblysta 1 298 adam ekpe alǵanyn aıta ketelik. Onyń altaýy muǵalim, jeteýi memlekettik qyzmetshi jáne 1 285-i medısına qyzmetkeri.
Elimizde birinshi kezekte medısına qyzmetkerleri ekpe alǵany belgili. Naýryz aıynda aq halattylarmen birge, ustazdar, quqyq qorǵaý organdarynyń qyzmetkerleri, al sáýirde stýdentter, mamyrda ekpeniń jetkilikti mólsherde bolýyna baılanysty qalǵan kontıngent ekpe alady dep josparlanyp otyr. 23 aqpanǵa deıingi jaǵdaı boıynsha 250 adamǵa ekpeniń ekinshi komponenti salynǵan. Ekpe alǵandar arnaıy medısınalyq baqylaýda. Aınagúl Mýsınanyń aıtýynsha, ekpeniń birinshi jáne ekinshi komponentin alǵannan keıin asqynýlar tirkelmegen.
Buǵan deıin toı-tomalaq ótkizgeni úshin meıramhana jáne toı ıelerine ǵana ákimshilik aıyppul salynyp kelse, endi oıyn-toı oryndaryna barǵany úshin jeke tulǵalar da jaýapkershilikke tartylatyn bolady. Jýyrda Atbasar aýdanynda osylaı toptasyp jıyn ótkizgen jelilik marketıng músheleri men qatysýshylary jazalanǵan. Jyl basynan beri monıtorıngtik toptar túrli menshik ıelerine jatatyn 6 951 nysanda karantın talaptarynyń saqtalýyna tekseris júrgizip, onyń 199-ynda zań buzýshylyqtardy anyqtaǵan.
Oblysymyzdyń bas sanıtarlyq dárigeriniń 27 aqpannan bastap kúshine enetin jańa qaýlysyna sáıkes, birqatar mekemelerdiń qyzmeti jandanady. Qoǵamdyq tamaqtaný nysandary endi apta boıy jumys isteıdi. Al fýdkorttarǵa tek tapsyrys qabyldaý arqyly ǵana jumys isteýge ruqsat etiledi. Ǵımarat ishindegi jáne syrtyndaǵy azyq-túliktik jáne azyq-túliktik emes bazarlar senbi kúnderi de jumysyn jalǵastyrady. Saýda nysandary, ıaǵnı sýpermarketter men gıpermarketter burynǵy rejim boıynsha jumys isteı beredi. Saýda úıleri, saýda-oıyn ortalyqtary da burynǵy rejim boıynsha jumys istep, jeksenbi kúnderi demalady. Balalar oıyn alańdaryna, attraksıondarǵa qyzmet kórsetýge ruqsat joq. Sonymen qatar jańa qaýlyǵa sáıkes, sán salondary, shashtarazdar, fıtnes, sport ortalyqtary klıentterdi aldyn ala jazylý boıynsha qabyldaı alady. Mádenıet nysandaryna da syıymdylyǵyn 20 paıyzdan jáne daıyndyq kezinde adam sanyn 30-dan asyrmaı qyzmet etýge ruqsat berildi.
Aqmola oblysy
