Bilim • 09 Naýryz, 2021

Pedagogıkalyq JOO-lardyń túlekteri biliktilik testileýden mindetti túrde ótedi

24 ret kórsetildi

Mınıstrlik pedagogıkalyq bilim berý sapasyn arttyrý jáne mektepterdi joǵary bilikti muǵalimdermen qamtamasyz etý boıynsha júıeli, keshendi jumysty júzege asyryp jatyr. Bul týraly Májilis depýtattarynyń saýalyna Bilim jáne ǵylym mınıstri Ashat Aımaǵambetovtiń jaýabynda aıtylǵan, dep habarlaıdy Egemen.kz

«Daryndy jastardy pedagogıkalyq mamandyqqa tartý maqsatynda muǵalimniń mártebesin kóterý úshin tıisti jumys jalǵastyrylýda. Pedagogıkalyq baǵyt boıynsha oqýǵa túsýge qoıylatyn talaptar birtindep kúsheıtilýde. Osylaı, 2020 jyly oqýǵa túsý baly 60-tan 70 balǵa deıin kóterildi, arnaıy emtıhan mazmuny ózektendirildi. Pedagogıkalyq joǵary oqý oryndarynda oqıtyn stýdentterdiń stıpendııasy ulǵaıtyldy (26 186-nan 42 000 teńgege deıin). Mektep muǵalimderiniń eńbekaqysy ósti. Mektep oqýshylary arasynda kásiptik baǵdar berý jumysyn júrgizý úshin JOO-lar bilim basqarmalarymen, mekteptermen ózara is-qımyl jasaıdy», dedi mınıstr.

Mınıstr tilge tıek etkendeı, qazirgi ýaqytta barlyq bilim berý baǵdarlamalary Pedagogtiń kásibı standartyna jáne jumys berýshilerdiń talaptaryna sáıkes jańartyldy.

Bul rette, pedagogıkalyq praktıkaǵa arnalǵan Ádistemelik usynystar jasalynǵan jáne oqytýdyń barlyq kezeńinde praktıkany uıymdastyrýdy kózdeıtin úzdiksiz praktıkalyq oqytý júıesi engizildi.

2018 jyldan bastap pedagogti attestattaý rásimderiniń jańa formaty engizildi. Osyǵan baılanysty mınıstrlik normatıvtik-quqyqtyq qujattarǵa ózgerister engizý boıynsha jumys júrgizdi. Oǵan sáıkes 2021 jyldan bastap pedagogıkalyq JOO-lardyń túlekteri úshin Ulttyq biliktilik testileýinen mindetti ótý normasy engizildi. Atalǵan shara túlekterdiń quzyrettiligin rastaýǵa jáne bilim berý uıymdaryn bilikti jas mamandarmen qamtamasyz etýge múmkindik beredi.

«Tájirıbe almasý aıasynda JOO oqytýshylarynyń jappaı ashyq onlaın kýrstaryn ázirlep, bilim berý platformalaryna ornalastyrýǵa múmkindikteri bar. Sonymen qatar, JOO-lar mekteptermen birlesip ózara tájirıbemen almasý jáne stýdentterge ınnovasııalyq pedagogıkalyq tehnologııalar men ádisterdi tıimdi oqytý maqsatymen konsorsıým qurdy. Qazirgi ýaqytta JOO-lar pedagogıkalyq qaıta daıarlaý baǵdarlamalaryn ázirleý boıynsha jumys júrgizýde. Osy baǵytta mınıstrlik JOO-larǵa pedagogıkalyq-psıhologııalyq daıyndyqty kúsheıtý úshin pedagogıkalyq qaıta daıarlaý baǵdarlamalarynyń mazmunyn ózgertip, oqý nátıjelerin túzetýdi usyndy», dedi Ashat Aımaǵambetov.

Sonymen qatar mınıstr jas mamandardy mektep jumysyna yntalandyrý úshin sheteldik JOO-lardy, «Bolashaq» baǵdarlamasyn, aǵylshyn tilinde pánderdi oqytý quqyǵymen bitirýshiler, sondaı-aq Prezıdenttik kadr rezervine kirgen adamdar úshin «pedagog-moderator» biliktilik sanatyn berýdiń jeńildetilgen tártibi engizilgenin atap ótedi.

«Osylaısha, mınıstrlik pedagogıkalyq bilim berý sapasyn arttyrý jáne mektepterdi joǵary bilikti muǵalimdermen qamtamasyz etý boıynsha júıeli, keshendi jumysty júzege asyrýda», dedi ol.

Sońǵy jańalyqtar

Uqsas jańalyqtar