Qyzylorda oblysy boıynsha sybaılas jemqorlyqqa qarsy is-qımyl departamentiniń mamandary azamattarǵa jalǵan anyqtamalardy saýdalap kelgen dárigerlerdi anyqtady. Olar koronavırýs juqtyrmaǵanyn dáleldeıtin PTR synamany 7 myń teńgege baǵalaǵan.
«Tergeý barysynda eki azamatshadan 37 mór tárkilendi. Bul iske qansha adamnyń qatysy baryn anyqtaıtyn bolamyz», dedi oblys boıynsha sybaılas jemqorlyqqa qarsy is-qımyl departamenti basshysynyń orynbasary Sultan Pirmetov.
Jalǵan anyqtama jasaýshy qyzmetkerler eki medısınalyq mekemeniń ókilderi bolyp shyqty. Biraq olar bir-birimen tyǵyz baılanysta, uıymdasqan túrde jumys istegen. «Aq halattaǵylardyń qylmysyna baılanysty tergeý bastaldy. Olar byltyrdan beri PTR-synamasynyń teris nátıjesi kórsetilgen jalǵan anyqtamalardy satyp kelgen. Negizinen vahtalyq jumysshylarǵa, saıahatqa shyǵýshylarǵa jáne basqa da maqsatta paıdalaný úshin anyqtamalar berilgen», deıdi agenttiktiń erekshe mańyzdy ister jónindegi tergeýshisi Danııar Bıǵaıdarov.
Sondaı-aq olar Ulttyq saraptama ortalyǵynyń aımaqtyq bólimshesiniń laýazymdy tulǵalaryna para berý arqyly zańsyz syıaqy alǵany belgili boldy.
